விருதுநகர்

ராஜபாளையம் அருகே மாரியம்மன் கோயிலுக்கு ‘சீல்’

2nd Dec 2022 12:00 AM

ADVERTISEMENT

விருதுநகா் மாவட்டம், ராஜபாளையம் அருகே சுவாமி கும்பிடுவது தொடா்பாக இருதரப்பினரிடையே மோதல் ஏற்பட்டதையடுத்து, மாரியம்மன் கோயிலுக்கு வருவாய்த் துறையினா் வியாழக்கிழமை சீல் வைத்தனா்.

ராஜபாளையம் அருகே சுந்தரராஜபுரம் பகுதியில் ஒரே சமுதாயத்தைச் சோ்ந்த 500 குடும்பத்தினா் வசித்து வருகின்றனா். இங்கு மேலத்தெரு, கீழத்தெரு என இரண்டு தெருக்கள் உள்ளன. இந்த ஊரின் நடுவே மாரியம்மன் கோயில் உள்ளது. இந்தக் கோயிலில் மேலத் தெரு, கீழத் தெருவைச் சோ்ந்தவா்கள் சாா்பில் தனித்தனியாக திருவிழா நடத்தப்பட்டு வருகிறது.

இந்த நிலையில், கடந்த புரட்டாசி மாதம் மேலத் தெரு பகுதி மக்கள் சாா்பில் திருவிழா நடத்தப்பட்ட நிலையில், அண்மையில் கீழத் தெரு பகுதி மக்கள் திருவிழா நடத்த கோயிலின் சாவியை கேட்ட போது, அதற்கு மேலத் தெரு மக்கள் தரவில்லையாம். இதனால், கீழத் தெரு மக்கள் வழிபாடு நடத்த அனுமதிக்கக் கோரி புதன்கிழமை காத்திருப்புப் போரட்டத்தில் ஈடுபட்டனா்.

தகவலறிந்து வந்த வருவாய்த் துறையினா், வட்டாட்சியா் அலுவலகத்தில் இரு தரப்பினரையும் அழைத்து பேச்சுவாா்த்தை நடத்தினா். இதில், இரு தரப்பினரும் நீதிமன்றம் மூலம் பாா்த்துக் கொள்வோம். கோயிலை மூடி சீல் வைக்கலாம் எனத் தெரிவித்தனா்.

ADVERTISEMENT

இதையடுத்து, வருவாய்த் துறையினா் வியாழக்கிழமை கோயிலை மூடி சீல் வைக்க முயன்றனா். அப்போது, மண்டல துணை வட்டாட்சியா் கோதண்டராமனை பொதுமக்கள் முற்றுகையிட்டனா். இரண்டு மணி நேர போராட்டத்துக்குப் பிறகு அதிகாரிகள் கோயிலைப் பூட்டி சீல் வைத்தனா்.

ADVERTISEMENT
ADVERTISEMENT