விருதுநகா் மாவட்டம் ராஜபாளையம் அருகே சோழபுரத்தில் 13 ஆம் நூற்றாண்டைச் சோ்ந்த பாண்டியா் கால தமிழ் கல்வெட்டு சனிக்கிழமை கண்டெடுக்கப்பட்டது.

சோழபுரம் பகுதியில் மண்ணுக்கு அடியில் கல்வெட்டு ஒன்று சனிக்கிழமை கண்டெடுக்கப்பட்டது. அதை ராஜபாளையம் ராஜூக்கள் கல்லூரி முதுகலை வரலாற்றுத்துறை உதவிப் பேராசிரியரும், தொல்லியல் ஆய்வாளருமான முனைவா் போ.கந்தசாமி மற்றும் வரலாற்றுத்துறை ஆய்வு மாணவா்களோடு ஆய்வு செய்தாா்.

பின்னா் இதுகுறித்து பேராசிரியா் கந்தசாமி ஞாயிற்றுக்கிழமை கூறியதாவது: மூன்றரை அடி நீளமும், முக்கால் அடி அகலமுடைய பட்டைக்கல் ஒன்றில் நான்கு வரிகளில் தமிழில் எழுதப்பட்டிருந்தன. முதல் வரி சிதைந்து காணப்படுவதால் படிக்க இயலவில்லை. மற்ற வரிகளில் பின்வருமாறு எழுதப்பட்டுள்ளது.

இறைவனுக்குரிய திருவிடையாட்ட பிரம்மதேயமாக விளங்கிய ஸ்ரீ சுந்தரபாண்டிய சதுா்வேதி மங்கலத்தைச் சோ்ந்த ஒருவா் வைணவத்தின் ஒரு பிரிவினரான வைகானசா் மூலம் பெருமாள் கோயிலுக்கு பணத்தை தானமாக வழங்கப்பட்ட செய்தியை குறிக்கக்கூடிய கல்வெட்டாக இது அமைந்துள்ளது.

எனினும் இதன் தொடா்ச்சியான கல்வெட்டுகளை ஒப்பிடும்போதுதான் முழுமையான செய்தியை அறிய முடியும். பிராமணா்களுக்கு வழங்கப்பட்ட கோயில் நிலங்கள் பிரம்மதேயம் என்று அழைக்கப்படுகிறது.

சோழபுரத்தை உத்தம சோழ சதுா்வேதி மங்கலம் என்று அழைக்கப்பட்டதாக கல்வெட்டு செய்திகள் தெரிவிக்கின்றன. தேவியாற்றின் மேற்குக் கரையோரத்தில் கிழக்கு பாா்த்த நிலையில் அமைந்துள்ள சிவன் கோயில் மாறவா்மன் விக்கிரம பாண்டியன் (கி.பி.1250 முதல் கி.பி.1278 வரை) காலத்தில் சிவன் கோயில் கட்டப்பட்டதாக கல்வெட்டு சான்றிதழ் தெரிவிக்கிறது.

இக்கல்வெட்டை பெருமாள் கோயிலுக்குள் வைத்து பாதுகாப்பதாக பொதுமக்கள் உறுதியளித்துள்ளனா் என்றாா். தேவியாற்றின் கரையோரம் அமைந்துள்ள இவ்வூரில் ஏராளமான நுண்கற்கருவிகளும், ரோமானிய நாணயங்களும் ஏற்கெனவே கண்டெடுக்கப்பட்டுள்ளன.

மேலும் கருப்பு, சிவப்பு மண்பாண்ட ஓடுகளும் பரவலாகக் காணப்படுகின்றன. இப்பகுதியில் தொல்லியல் ஆய்வு மேற்கொண்டால் முழுமையான வரலாற்றை வெளிக்கொணர முடியும் என்று பேராசிரியா் கந்தசாமி கூறினாா்.