விருதுநகா் மேற்கு மாவட்ட அதிமுக சாா்பில் நகா்ப்புற உள்ளாட்சித் தோ்தலில் போட்டியிடுவோருக்கான விருப்ப மனு விநியோகத்தை முன்னாள் அமைச்சரும், அதிமுக மேற்கு மாவட்டச் செயலாளருமான கே.டி.ராஜேந்திரபாலாஜி தொடங்கி வைத்தாா்.

விருதுநகா் மேற்கு மாவட்ட அதிமுகவில் விருதுநகா், ராஜபாளையம், ஸ்ரீவில்லிபுத்தூா் ஆகிய 3 நகராட்சிகளும், மம்சாபுரம், வத்திராயிருப்பு, வ.புதுப்பட்டி, கொடிக்குளம், சேத்தூா், செட்டியாா்பட்டி, சுந்தரபாண்டியம் ஆகிய 7 பேரூராட்சிகளும் உள்ளன. இந்நிலையில் திருத்தங்கலில் உள்ள மேற்கு மாவட்ட அதிமுக மாவட்டத் தலைமை அலுவலகத்தில் , நகா்ப்புற உள்ளாட்சித் தோ்தலில் போட்டியிட விரும்புவோருக்கு விருப்ப மனு வழங்கும் நிகழ்ச்சியை அதிமுக மேற்கு மாவட்டச் செயலாளா் கே.டி.ராஜேந்திரபாலாஜி தொடக்கி வைத்தாா்.

நகராட்சி வாா்டு உறுப்பினா் பதவிக்கு போட்டியிடுபவா் விண்ணப்பப் படிவத்தை பூா்த்தி செய்து ரூ. 2,500-ம், பேரூராட்சி வாா்டு உறுப்பினா் பதவிக்கு போட்டியிடுவோா் ரூ. 1,500-ம் கட்டணமாகச் செலுத்த வேண்டும் என கே.டி.ராஜேந்திரபாலாஜி தெரிவித்தாா். இதில் ஸ்ரீவில்லிபுத்தூா் சட்டப்பேரவை உறுப்பினா் மான்ராஜ், கட்சியின் மாவட்ட அவைத்தலைவா் விஜயகுமாரன் உள்ளிட்டோா் கலந்து கொண்டனா்.