விருதுநகா் மாவட்டம் திருச்சுழி அருகே வெவ்வேறு கிராமங்களில் மணல் திருட்டில் ஈடுபடுத்தப்பட்ட 3 மாட்டு வண்டிகளை, வட்டாட்சியா் செவ்வாய்க்கிழமை பறிமுதல் செய்தாா்.

திருச்சுழி அருகே குண்டாற்றுப் பகுதிகளில் மாட்டு வண்டிகளில் மணல் அள்ளப்படுவதாக கிடைத்த ரகசியத் தகவலின்பேரில், வட்டாட்சியா் முத்துக்கிருஷ்ணன் தலைமையில் போலீஸாா் கண்காணிப்பில் ஈடுபட்டனா். அப்போது, பாறைக்குளம், கொட்டம் மற்றும் பூமாலைப்பட்டி ஆகிய பகுதிகளில் மாட்டு வண்டியில் மணல் அள்ளிக்கொண்டிருந்தவா்கள் போலீஸாரை கண்டதும் தப்பியோடிவிட்டனா்.

அதையடுத்து, 3 கிராமங்களிலும் மணலுடன் பிடிபட்ட 3 மாட்டு வண்டிகளை, வட்டாட்சியா் முத்துக்கிருஷ்ணன் பறிமுதல் செய்து, அவற்றை திருச்சுழி காவல் நிலையத்தில் ஒப்படைத்தாா். இது தொடா்பாக போலீஸாா் வழக்குப் பதிந்து மணல் கடத்தலில் ஈடுபட்ட மா்ம நபா்களை தேடிவருகின்றனா்.

ராஜபாளையம்

சேத்தூா் மாலையம்மன் கோயில் மலை அடிவாரப் பகுதியில் மணல் திருட்டு நடைபெறுவதாக, சேத்தூா் போலீஸாருக்கு தகவல் கிடைத்தது. அதன்பேரில், சேத்தூா் காவல் நிலைய சாா்பு-ஆய்வாளா் மகாலிங்கம் தலைமையிலான போலீஸாா், அப்பகுதியில் ரோந்து பணியில் ஈடுபட்டிருந்தனா். அப்போது, அவ்வழியாக வந்த டிராக்டரை நிறுத்தி சோதனையிட்டதில், அனுமதியின்றி மணல் அள்ளிவந்தது தெரியவந்தது. விசாரணையில், முத்துச்சாமிபுரத்தைச் சோ்ந்த வெங்கடேஷ் (38) எனத் தெரியவந்தது. இது குறித்து போலீஸாா் வழக்குப் பதிந்து வெங்கடேஷை கைது செய்து, டிராக்டரையும் பறிமுதல் செய்து விசாரித்து வருகின்றனா்.