விருதுநகரில் நகராட்சி அனுமதி பெறாமல் குறுகலான உள்தெருவில் மீண்டும் காய்கனிச் சந்தை திறக்கப்பட்டுள்ளதால் கரோனா தொற்று அதிகரிக்கும் நிலை ஏற்பட்டுள்ளதாக சமூக ஆா்வலா்கள் புகாா் தெரிவிக்கின்றனா்.

விருதுநகா் கடைவீதி அருகேயுள்ள உள்தெருவில் நகராட்சி அனுமதியின்றி ஏற்கெனவே காய்கனிச் சந்தை செயல்பட்டு வந்தது. சுமாா் 10 முதல் 15 அடி அகலம் கொண்ட இப்பகுதியில் 150-க்கும் மேற்பட்ட கடைகள் உள்ளன. கடும் நெரிசலான இப்பகுதியில் பொதுமக்கள் காய்கனி உள்ளிட்ட பொருள்கள் வாங்கி வந்தனா்.

இந்நிலையில், கரோனா தொற்று காரணமாக இச்சந்தை கடந்த 5 மாதங்களாக மூடப்பட்டது. இதற்கு மாற்றாக புதிய பேருந்து நிலையம், உழவா் சந்தை, நகராட்சி மைதானம், தனியாா் பள்ளி வளாகம் ஆகிய இடங்களில் காய்கனிகள் விற்பனை செய்ய இடம் ஒதுக்கப்பட்டது. இந்நிலையில், புதிய பேருந்து நிலையத்தில் செயல்பட்டு வந்த காய்கனிக் கடைகள் அனைத்தும் நகராட்சி நிா்வாக அனுமதி பெறாமல், உள்தெருவில் மீண்டும் திறக்கப்பட்டன. குறுகலான இப்பகுதியில் பொதுமக்கள் இடை வெளியின்றி கூடுவதால் கரோனா தொற்று அதிகரிக்கும் நிலை உள்ளது. இதுதொடா்பாக நகராட்சி நிா்வாகம் நடவடிக்கை எடுக்க வேண்டும் என சமூக ஆா்வலா்கள் கோரிக்கை விடுத்துள்ளனா்.

இதுதொடா்பாக நகராட்சி ஆணையாளா் பாா்த்தசாரதி கூறியது: புதிய பேருந்து நிலையத்தில் மொத்த வியாபாரிகள் காய்கனிகள் விற்பனை செய்து வந்தனா். இந்நிலையில், ஏற்கனவே உள்தெருவில் செயல்பட்டு வந்த காய்கனிக் கடைகளுக்கு வாடகை செலுத்தி வருவதால், அந்த இடத்திற்கு செல்வதாக கேட்டனா். ஆனால், அதற்கான அனுமதி எதுவும் நகராட்சி நிா்வாகம் சாா்பில் வழங்கவில்லை. இருப்பினும், உள்தெருவில் கடைகள் திறக்கப்பட்டுள்ளன. அங்கு கரோனா தொற்று பரவல் அதிகரித்தால் உரிய நடவடிக்கை மேற்கொள்ளப்படும் என்றாா்.