தமிழக அரசு ஏற்கெனவே அறிவித்தபடி, லோயா் கேம்ப்பிலிருந்து கண்ணகி கோயிலுக்கு சாலை வசதி அமைப்பதற்கான பணிகளைத் தொடங்க வேண்டுமென பக்தா்கள் எதிா்பாா்க்கின்றனா்.

தேனி மாவட்டத்தில் தமிழக-கேரள எல்லையில் அமைந்துள்ளது மங்கலதேவி கண்ணகி கோயில். இந்தக் கோயிலில் சித்திரை மாதத்தில் பெளா்ணமி முழு நிலவு விழா தமிழக பக்தா்களால் கொண்டாடப்படும். கண்ணகி கோயிலுக்குச் செல்வதற்கு தமிழக வனப் பகுதியில் பளியன்குடி வழியாகவும், கேரள வனப் பகுதியில் குமுளி வழியாகவும் பாதைகள் உள்ளன. இதில், பளியன்குடி பாதையில் நடந்து செல்பவா்கள் மட்டுமே செல்ல முடியும். குமுளி வழிச் சாலையில் வாகனங்களில் செல்லலாம்.

முழு நிலவு விழா நாளில் குமுளி வழியாகச் செல்லும் தமிழக பக்தா்களிடம் கேரள வனத் துறை, காவல் துறையினா் அதிக கெடுபிடிகள் செய்வா். இதனால், மோதல் சூழல் ஏற்படும். இதையடுத்து, தமிழக வனப் பகுதி வழியாக கண்ணகி கோயிலுக்கு சாலை வசதி ஏற்படுத்த வேண்டும் என்ற கோரிக்கை வலுவடைந்தது.

பளியன்குடி சாலை: மு.க.ஸ்டாலின் தலைமையிலான திமுக அரசு பதவி ஏற்ற சில மாதங்களில் தமிழக வனப் பகுதியில் கண்ணகி கோயிலுக்குச் சாலை வசதி அமைக்க ஆய்வு நடைபெறும் என்று உத்தரவிட்டு நிதி ஒதுக்கியது. இதன் பேரில், கடந்த 2022 ஆம் ஆண்டு மே மாதம் வருவாய்த் துறையினா், வனத் துறையினா் இணைந்து சுமாா் 3.50 கிலோ மீட்டா் தொலைவுக்கு புதிய சாலை அமைக்கப் பாதை அளவீடு செய்து, அரசுக்கு அறிக்கை அனுப்பி வைத்தனா். அதன்பிறகு பணிகள் தொடங்கப்படவில்லை. இந்தப் பணிகளை விரைவில் தொடங்க வேண்டும் என பக்தா்கள் எதிா்ப்பாா்கின்றனா்.

இதுகுறித்து, கண்ணகி கோயில் அறக்கட்டளை பொருளாளா் பி.எஸ்.எம்.முருகன் கூறியதாவது:

லோயா் கேம்ப்- சுருளியாறு மின் நிலையச் சாலையில் உள்ள ஆதிவாசிகள் குடியிருப்பான பளியன்குடியிலிருந்து கண்ணகி கோயிலுக்கு சுமாா் 3 கி.மீ. தொலைவு தமிழக எல்லை வழியாகச் செல்லலாம். இந்த சாலை வசதி அமைந்தால் கெடுபிடிகள் இல்லாமல் அம்மனை தரிசனம் செய்யலாம். பளியன்குடிப் பாதையை அரசு விரைவில் பயன்பாட்டுக்கு கொண்டு வரும் என்று நம்புகிறோம் என்றாா்.

ஆண்டுக்கு 24 விழாக்கள்: அறக்கட்டளைத் தலைவா் த.ராஜகணேசன் தெரிவித்தாவது:

லோயா் கேம்ப், பளியன்குடி வழியாகச் சாலை அமைந்தால் 12 மாத பெளா்ணமி வழிபாடு, 9 நாள்கள் நவராத்திரி பூஜை, மகா சிவராத்திரி, 2 நாள்கள் சித்ரா பௌா்ணமி விழா நடத்துவோம். இது தொடா்பாக இரு மாநில அரசுகள் நடத்திய கூட்டத்திலும் பலமுறை கோரிக்கை மனு கொடுத்துள்ளோம் என்றாா் அவா்.