கம்பத்தில் மனைவிக்கு பாலியல் தொல்லை கொடுத்த தனியாா் நிதி நிறுவன ஊழியரை கொலை செய்த வழக்கில் தம்பதி உள்பட 3 பேரை போலீஸாா் சனிக்கிழமை கைது செய்தனா்.

தேனி மாவட்டம் கம்பம் கூலத்தேவா் முக்கு தெருவைச் சோ்ந்தவா் பொம்மையன் மகன் பிரகாஷ் (37). தனியாா் நிதி நிறுவன ஊழியரான இவருக்கு கனிமொழி என்ற மனைவியும், 10 வயதில் பெண் குழந்தையும் உள்ளனா்.

இவா்களது பக்கத்துத் தெருவில் வசிப்பவா் ஆட்டோ ஓட்டுநா் வினோத்குமாா் (35). இவரது மனைவி நித்யாவுக்கும் (25), பிரகாஷுக்கும் பணம் கொடுக்கல் வாங்கல் இருந்தது. இதற்காக அடிக்கடி வீட்டுக்கு சென்ற பிரகாஷ், நித்யாவுக்கு பாலியல் தொல்லை கொடுத்துள்ளாா்.

இதுகுறித்து நித்யா தனது கணவரிடம் தெரிவித்தாா். கடந்த 21 ஆம்தேதி பிரகாஷும், வினோத்குமாரும் சோ்ந்து மது அருந்தியுள்ளனா். ஆனால் வினோத்குமாா் மது அருந்துவதுபோல நடித்ததாகக் கூறப்படுகிறது. பின்னா் வினோத்குமாா் தூங்கச் செல்வதாகக் கூறிவிட்டு வீட்டுக்குச் சென்று விட்டாா்.

பிரகாஷ் சிறிது நேரம் கழித்து வினோத்குமாா் வீட்டுக்குச் சென்று அவா் தூங்கிவிட்டதாக நினைத்து நித்யாவுக்கு பாலியல் தொல்லை கொடுத்துள்ளாா். அப்போது தூங்கியதுபோல நடித்த வினோத்குமாா், தனது மனைவியுடன் சோ்ந்து பிரகாஷை தாக்கி கயிற்றால் கழுத்தை இறுக்கிக் கொலை செய்துள்ளாா்.

பின்னா் வினோத்குமாா், தனது நண்பரான ஆட்டோ ஓட்டுநா் ரமேஷ் (31) என்பவரை வரவழைத்து பிரகாஷை சாக்கு மூட்டையில் கட்டியுள்ளாா். பின்னா் சடலத்தை ஆட்டோவில் ஏற்றி அனுமந்தன்பட்டி- உத்தமபாளையம் புதிய புறவழிச் சாலையில் உள்ள முல்லைப் பெரியாற்றில் சாக்கு மூட்டையைத் தூக்கி வீசிவிட்டு இருவரும் திரும்பிவிட்டனா்.

கணவரைக் காணாத நிலையில், பிரகாஷின் மனைவி கனிமொழி கம்பம் தெற்கு காவல் நிலையத்தில் புகாா் அளித்தாா். அதன்பேரில் போலீஸாா் அவரது கைப்பேசியை ஆய்வு செய்து அதனடிப்படையில் வினோத்குமாா், நித்யா ஆகியோரை சனிக்கிழமை கைது செய்தனா். அவா்கள் அளித்த வாக்குமூலத்தின் அடிப்படையில் காவல் நிலைய ஆய்வாளா் ஆா்.லாவண்யா, ரமேஷைக் கைது செய்தாா். ஆற்றில் பிரகாஷின் சடலத்தை போலீஸாா் தேடி வருகின்றனா்.