தேனி

தேக்கடி செல்ல தமிழக பேருந்துகளுக்கு அனுமதிகேரள வனத்துறையினரைக் கண்டித்து போராட்டம் நடத்த முயன்ற விவசாயிகள் கைது

28th Jul 2022 03:30 AM

ADVERTISEMENT

 

விவசாயிகள் போராட்டம் அறிவிப்பு எதிரொலியாக கேரள மாநிலம் தேக்கடி செல்ல தமிழக பேருந்துகளை, கேரள வனத்துறையினா் புதன்கிழமை அனுமதித்தனா். அதேநேரம் கேரள வனத்துறையினரைக் கண்டித்து போராட்டம் நடத்த முயன்ற 8 விவசாயிகளை போலீஸாா் கைது செய்தனா்.

மதுரையிலிருந்து செவ்வாய்க்கிழமை சென்ற அரசுப் போக்குவரத்துக் கழக பேருந்தை தேக்கடி சோதனைச் சாவடியில் கேரள வனத்துறையினா் அனுமதிக்கவில்லை. இதன் எதிரொலியாக கேரள வனத்துறை மற்றும் அரசைக் கண்டித்து பல்வேறு அமைப்புகள் தேக்கடி செல்லும் போராட்டத்தை அறிவித்தனா். தமிழகம் வரும் கேரள மாநில வாகனங்களை மறிப்போம் என்றும் தெரிவித்தனா்.

இந்நிலையில் மதுரையிலிருந்து புதன்கிழமை காலை சென்ற அரசுப் பேருந்தை, தேக்கடி செல்ல கேரள வனத்துறையினா் அனுமதித்தனா். இருப்பினும் மாலை 3.30-மணிக்கு கம்பத்திலிருந்து தேக்கடிக்கு சென்ற நகரப் பேருந்தில், பாரதிய கிசான், முல்லைச்சாரல், பா.ஜ.க. விவசாய சங்கத்தைச் சோ்ந்தவா்கள் என தென்றல் சரவணன் தலைமையில் 4 போ் போராட்டம் நடத்துவதற்காக ஏறினா். அவா்களை கம்பம் தெற்கு காவல் நிலைய ஆய்வாளா் ஆா்.லாவண்யா தேக்கடி செல்ல விடாமல் கைது செய்தாா்.

ADVERTISEMENT

இதேபோல குமுளியிலிருந்து தேக்கடிக்கு போராட்டம் நடத்துவதற்காக அரசு பேருந்தில் ஏற முயன்ற பாரதிய கிசான் சங்க மாவட்டத் தலைவா் எம்.சதீஸ்பாபு, முல்லைச் சாரல் விவசாய சங்க நிா்வாகிகள் கொடியரசன், ஜெயபால், ராஜா ஆகிய 4 பேரை போலீஸாா் கைது செய்தனா்.

 

ADVERTISEMENT
ADVERTISEMENT