மைய வளாகத்தில் சிறுமியை பாலியல் துன்புறுத்தல் செய்து, அச்சிறுமியை தீ வைத்து எரித்துக் கொலை செய்ய முயன்ற இளைஞரை போக்சோ சட்டத்தில் ஞாயிற்றுக்கிழமை போலீஸாா் கைது செய்தனா்.

தேனி மாவட்டம் சின்னமனூா் அருகேயுள்ள எரசக்கநாயக்கனூரில் உள்ள ஊராட்சி ஒன்றியத் தொடக்கப்பள்ளி வளாகத்தில் அங்கன்வாடி மையம் செயல்பட்டு வருகிறது. இந்த மையத்தின் சமையல் உதவியாளா், 3 ஆம் வகுப்பு படிக்கும் தனது பேத்தியை அழைத்து வந்துள்ளாா்.

அந்த அங்கன்வாடி மைய வளாகத்தில் விளையாடிக் கொண்டிருந்த அச்சிறுமி அலறல் சப்தம் கேட்டு அங்கிருந்த பணியாளா்கள் அப்பகுதிக்கு விரைந்துள்ளனா். அப்போது உடலில் தீப்பற்றி எரிந்த நிலையில் சிறுமியை மீட்டு, தேனி அரசு மருத்துவக்கல்லூரி மருத்துவமனைக்கு அனுப்பி வைத்தனா். இதில் சிறுமி 45 சதவீத தீக்காயங்களுடன் ஆபத்தான நிலையில், சிகிச்சை பெற்று வருகிறாா்.

இதுதொடா்பாக மாவட்டக் காவல் கண்காணிப்பாளா் பிரவீன் உமேஷ் டோங்கரே உத்தரவின் பேரில் சின்னமனூா் காவல் ஆய்வாளா் சேகா் தலைமையிலான போலீஸாா் நடத்திய விசாரணையில், அப்பகுதி சி.சி.டி.வி. கேமராவில் பதிவான ஈஸ்வரன் மகன் விஜயக்குமாா் (18) என்பவரைப் பிடித்து விசாரித்தனா். அதில், அங்கன்வாடி மைய வளாகத்தில் மது அருந்திக் கொண்டிருந்த விஜயக்குமாரை சிறுமி தட்டிக் கேட்டுள்ளாா். அப்போது சிறுமியை பாலியல் துன்புறுத்தலில் ஈடுபட்டதோடு, சிறுமியின் ஆடையில் தீ வைத்துக் கொலை செய்ய முயற்சி செய்தது தெரியவந்தது. இதையடுத்து சின்னமனூா் போலீஸாா் போக்சோ சட்டப்பிரிவு மற்றும் கொலை முயற்சி பிரிவின் கீழ் வழக்கு பதிவு செய்து விஜயக்குமாரைக் கைது செய்தனா்.