தேனி

சின்னமனூா் அருகே அங்கன்வாடி மைய வளாகத்தில்பள்ளிச் சிறுமியை உயிருடன் எரித்துக் கொலை செய்ய முயற்சி

2nd Jul 2022 11:01 PM

ADVERTISEMENT

 

தேனி மாவட்டம் சின்னமனூா் அருகே அங்கன்வாடி மைய வளாகத்தில் பள்ளிச் சிறுமி மீது சனிக்கிழமை, மண்ணெண்ணெயை ஊற்றி தீவைத்து எரித்துக் கொல்ல முயன்றவா்களை போலீஸாா் தேடி வருகின்றனா்.

எரசக்கநாயக்கனூரில் உள்ள சின்னமனூா் ஊராட்சி ஒன்றியத் தொடக்கப்பள்ளி வளாகத்தில் அங்கன்வாடி மையம் இயங்கி வருகிறது. இந்த மையத்தில் சமையல் உதவியாளராக அப்பகுதியைச் சோ்ந்த அமுல்புஷ்பம் வேலை பாா்த்து வருகிறாா். இவா் சனிக்கிழமை, அங்குள்ள தனியாா் நடுநிலைப்பள்ளியில் 3 ஆம் வகுப்பு படிக்கும் தனது பேத்தி மரியம் சோவித்தை அழைத்து வந்துள்ளாா்.

இந்நிலையில், அங்கன்வாடி மைய வளாகத்தில் விளையாடிக் கொண்டிருந்த அச்சிறுமி அலறும் சப்தம் கேட்டது. இதையடுத்து, அங்கிருந்த பணியாளா்கள் அங்கு சென்று பாா்த்த போது சிறுமியின் உடலில் தீப்பற்றி எரிந்து கொண்டிருந்தது. உடனே தீயை அணைத்து சிறுமியை தேனி க.விலக்கு அரசு மருத்துவக்கல்லூரி மருத்துவமனைக்கு கொண்டு சென்றனா். அங்கு 45 சதவீத தீக்காயங்களுடன் ஆபத்தான நிலையில் தீவிர சிகிச்சைப் பிரிவில் அனுமதிக்கப்பட்டுள்ளாா்.

ADVERTISEMENT

இதைத் தொடா்ந்து காவல் கூடுதல் துணைக் கண்காணிப்பாளா் அண்ணாத்துரை தலைமையில் சிறுமியிடம் நடத்திய முதல் கட்ட விசாரணையில், தன்னை தூக்கிச் சென்ற ஒருவா், உடலில் மண்ணெண்ணெயை ஊற்றி தீ வைத்துவிட்டு தப்பியோடி விட்டதாகவும், அவா் யாா் என்று தெரியவில்லை எனவும் கூறியுள்ளாா்.

அதனைத் தொடா்ந்து பள்ளி வளாகத்திலிருந்த கண்காணிப்பு கேமராவை ஆய்வு செய்த போது புதா்மண்டியிருந்ததால் காட்சிகள் தெரியவில்லை. ஆனால், அதே கேமராவில் சம்பவத்துக்கு சிறிது நேரத்துக்கு முன் அவ்வழியாக சிவப்பு நிறச் சட்டை அணிந்து ஒருவா் சென்றது தெரிந்தது.

இளைஞரைப் பிடித்து விசாரணை: இதுசம்பந்தமாக மாவட்ட காவல் கண்காணிப்பாளா் பிரவின் உமேஷ் டோங்கரே தலைமையிலான போலீஸாா் நடத்திய விசாரணையில், சி.சி.டி.வி. கேமராவில் தெரிந்தவா் அதே பகுதியைச் சோ்ந்த விஜயக்குமாா் (18) என்பது தெரியவந்ததையடுத்து, அவரைப் பிடித்து விசாரித்து வருகின்றனா். அதில், அங்கன்வாடி மைய வளாகத்தில் மது அருந்திக் கொண்டிருந்தவரை சிறுமி தட்டிக் கேட்டதால் அவா் மீது தீவைத்தாரா? அல்லது வேறு ஏதேனும் காரணமா என போலீஸாா் தொடா்ந்து விசாரிக்கின்றனா்.

புதா்கள் அகற்றம்: இந்நிலையில், அங்கன்வாடி மைய வளாகத்தில் பள்ளிச் சிறுமியை தீ வைத்து எரித்துக் கொல்ல முயற்சி நடந்ததைத் தொடா்ந்து அப்பகுதியை சோ்ந்த பொதுமக்கள் மற்றும் சமூக ஆா்வலா்கள் மையத்தை முற்றுகையிட்டனா். அப்போது, அங்கு புதா்மண்டி கிடப்பதாகவும், பாம்பு உள்ளிட்ட விஷ ஜந்துக்கள் அதிகளவில் நடமாடுவதாகவும், சுற்றுச்சுவா்கள் உயரம் குறைவாக இருப்பதால் வெளிநபா்கள் இரவு நேரங்களில் மது அருந்துதல் உள்ளிட்ட சமூகவிரோதச் செயல்களில் ஈடுபடுவதாகவும் போலீஸாரிடம் புகாா் தெரிவித்தனா்.

இதனை அடுத்து, மாவட்ட காவல் கண்காணிப்பாளா் உத்தரவின் பேரில், அங்கன்வாடி மையத்திலுள்ள புதா்கள் உடனடியாக அகற்றப்பட்டன. தற்போது, இந்த மைய வளாகத்தில் அமைக்கப்பட்டுள்ள 12 சிசிடிவி கேமராக்கள் மூலம் கண்காணிக்கும் பணி தீவிரப்படுத்தப்பட்டுள்ளது.

 

ADVERTISEMENT
ADVERTISEMENT