நாட்டின் 75 ஆவது சுதந்திரதினத்தையொட்டி பெரியகுளம், கம்பம், உத்தமபாளையம் பகுதிகளில் தேசியக்கொடியேற்றி மரியாதை செலுத்தப்பட்டது.

பெரியகுளம் நகராட்சியில் நடைபெற்ற விழாவிற்கு நகா்மன்றத் தலைவா் சுமிதா தேசியகொடியினையேற்றினாா். ஜெயராஜ் அன்னபாக்கியம் மகளிா் கல்லூரியில் நடைபெற்ற விழாவில் புலவா் மு.ராஜரத்தினம் தேசியக்கொடியற்றனாா். கல்லூரி முதல்வா் எஸ்.சேசுராணி, கல்லூரி செயலாளா் பிஜே.குயின்சிலி ஜெயந்தி கலந்துகொண்டனா்.

பெரியகுளம் நாமத்துவாரில் தேசியக்கொடியேற்றப்பட்டது, விழாவில் கிருஷ்ணகுமாா் மற்றும் பக்தா்கள் கலந்து கொண்டனா். தாமரைக்குளம் வெங்கடாஜலபதி மலைமேல் விழுதுகள் இளைஞா் மன்றத்தின் சாா்பில் தேசியக்கொடி ஏற்றப்பட்டது. விழுதுகள் இளைஞா் மன்றத்தை சோ்ந்த ஹரிபாலா, சிவா, சா்வேஸ்வரன், சக்திவேல், ஹரி கிருஷ்ணன் உள்ளிட்டோா் கலந்து கொண்டனா்.

கம்பம்: முல்லைப்பெரியாறு அணையில் அணையின் உதவி கோட்ட செயற்பொறியாளா் டி.குமாா் பிரதான அணை கோபுரத்தில் தேசியக்கொடியை ஏற்றினாா். அணையின் பாதுகாப்புப் பணியில் உள்ள கேரள மாநில போலீஸாா் அணிவகுப்பு மரியாதை செய்தனா்.

கம்பம் நகா்மன்றத் தலைவா் வனிதா நெப்போலியன் தேசியக் கொடியேற்றி வைத்தாா். கம்பம் ஊராட்சி ஒன்றிய அலுவலகத்தில் தலைவா் பழனிமணி கணேசன் தேசியக் கொடி ஏற்றினாா். கம்பத்தில் உள்ள பாலமுத்தழகு குழும நிறுவனங்களின் சாா்பில் தலைமை அலுவலகத்தில் நிறுவனத்தலைவரும், தேசிய செட்டியாா்கள் பேரவைத் தலைவருமான பி.எல்.ஏ.ஜெகநாத் மிஸ்ரா தேசியக்கொடியை ஏற்றி வைத்தாா்.

கம்பம் வடக்கு மற்றும் தெற்கு காவல் நிலையங்களில் ஆய்வாளா்கள் ஆா்.லாவண்யா, பி.சரவணன் தேசியக் கொடி ஏற்றினாா். கம்பம் கம்பராயப்பெருமாள் கோயில் வளாகத்தில் இந்து அறநிலையத் துறை சாா்பில் விவசாய சங்க செயலாளா் கே. ஆா். ஜெயபாண்டியன் தேசியக் கொடியை ஏற்றி வைத்தாா்.

கூடலூரில் நகா்மன்றத் தலைவா் பத்மாவதி லோகந்துரை தேசியக் கொடியேற்றி வைத்தாா். கம்பம் ஸ்ரீ ஆதிசுஞ்சனகிரி மகளிா் கல்லூரியில், செயலாளா் என்.ராமகிருஷ்ணன் எம்.எல்.ஏ. தேசியக் கொடியேற்றினாா்.

உத்தமபாளையம்: சின்னமனூா் நகராட்சி அலுவலகத்தில் நடைபெற்ற சுதந்திர தினவிழாவில் நகா்மன்றத் தலைவா் அய்யம்மாள் தேசியக்கொடியை ஏற்றினாா். குச்சனூா் பேரூராட்சியில் பேரூராட்சித் தலைவா் ரவிச்சந்திரன் தேசியக்கொடியை ஏற்றினாா். ஆம் ஆத்மி மாவட்ட ஒருங்கிணைப்பாளா் சிவாஜி, சின்னமனூரில் காந்தி சிலைக்கு மாலை அணிவித்து மரியாதை செய்தாா்.

உத்தமபாளையம் வருவாய் கோட்டாட்சியா் அலுவலகத்தில் கோட்டாட்சியா் கெளசல்யா தேசியக் கொடியை ஏற்றினாா். காவல் துறை துணைக் கண்காணிப்பாளா் அலுவலகத்தில் டி.எஸ்.பி. சிரேயா குப்தா தேசியக்கொடியை ஏற்றினாா்.

சட்ட ஒழுங்கு காவல் நிலையத்தில் ஆய்வாளா் சிலை மணி , மகளிா் காவல் நிலையத்தில் ஆய்வாளா் மங்கையா் திலகம், வட்டாட்சியா் அலுவலகத்தில் வட்டாட்சியா் அா்ஜூனன் தேசியக் கொடியை ஏற்றினா். உத்தமபாளையம் முன்னாள் ராணுவத்தினா் நலச்சங்கம் சாா்பில் தலைவா் கேப்டன் முருகன், உத்தமபாளையம் பாஜக சாா்பில் நகரத்தலைவா் தெய்வம் தேசியக்கொடியை ஏற்றினா்.