குச்சனூா் சனீஸ்வரா் கோயிலில் ஆடித் திருவிழா முன்னிட்டு சோணைக் கருப்பணசுவாமிக்கு 1,200 மதுபாட்டில்கள் திங்கள்கிழமை படையலிடப்பட்டன.

தேனி மாவட்டம் குச்சனூா் சுயம்பு சனீஸ்வரா் கோயில் ஆடிப்பெருந்திருவிழா கடந்த மாதம் தொடங்கி நடைபெற்று வருகிறது. இந்நிலையில் 4 ஆம் வாரத்தில் முக்கிய நிகழ்ச்சியாக உப சந்நிதியில் காவல் தெய்வமாக காட்சியளிக்கும் சோணைக் கருப்பணசுவாமிக்கு பக்தா்கள் காணிக்கையாக செலுத்திய 1,200 மதுபாட்டில்கள் படையிலிடப்பட்டன. இதனை கோயில் பூசாரிகள் 5 போ் கொண்ட குழுவினா், சோணை கருப்பணசுவாமியின் குதிரைக்கு கீழுள்ள சிறிய துவாரம் வழியாக மதுபாட்டில்களை திறந்து ஊற்றி பூஜை செய்தனா். இரவு 8 மணிக்கு தொடங்கிய பூஜை நள்ளிரவு 12 மணி வரை நீடித்தது.

பின்னா் பக்தா்கள் வழங்கிய 34 ஆடுகள் மற்றும் 25 கோழிகள் பலியிட்டு கோயில் வளாகத்தில் சமையல் செய்து விடிய விடிய பக்தா்களுக்கு கறிவிருந்து வழங்கப்பட்டது. இதில் சுற்றுவட்டாரப் பகுதியைச் சோ்ந்த திரளான பக்தா்கள் கலந்து கொண்டனா்.