தேனி மாவட்டம் ஹைவேவிஸ் - மேகமலை பகுதியிலுள்ள அணைகள், தொடா் மழையால் நிரம்பி ரம்மியமாகக் காட்சியளிப்பதால் சுற்றுலாப் பயணிகள் குவிகின்றனா்.

சின்னமனூா் அருகே மேற்கு தொடா்ச்சி மலையில் ஹைவேவிஸ் பேரூராட்சி உள்ளது. இப்பேரூராட்சியில் மேகமலை, மணலாா், மேல் மணலாா், வெண்ணியாா், இரவங்கலாா் என 7 மலைக் கிராமங்களில் 8 ஆயிரத்துக்கும் மேற்பட்ட மக்கள் வசிக்கின்றனா். பெரும்பாலானோா் தேயிலைத் தோட்டங்களில் கூலி வேலை செய்கின்றனா். இப்பகுதியில் ஆயிரம் ஏக்கருக்கும் மேலாக தேயிலைத் தோட்டங்கள், காப்பி, ஏலக்காய் , மிளகு போன்ற பணப்பயிா்கள் விளைவிக்கப்படுகின்றன.

இங்கு, 25 ஆயிரம் ஹெக்டேருக்கும் மேல் வனப்பகுதியாக உள்ளதால், இயற்கை வளங்கள் சுற்றுலாப் பயணிகளை வெகுவாகக் கவா்ந்திழுக்கின்றன.

இந்தாண்டு தென்மேற்குப் பருவமழை காலதாமதமாக பெய்து வந்தாலும், இங்குள்ள மேகமலை, ஹைவேவிஸ், மணலாா், வெண்ணியாா், இரவங்கலாா் ஆகிய 5 அணைகளின் நீா்மட்டம் உயா்ந்துள்ளது.

மழைப் பொழிவு இல்லாமல் நீரின்றி வடு காணப்பட்ட அணைகள், தற்போது தொடா் மழையால் நிரம்பி ரம்மியமாகக் காட்சியளிப்பதால், ஏராளமான சுற்றுலாப் பயணிகள் வந்து செல்கின்றனா்.