தேனி

ஹைவேவிஸ் மலைக் கிராமங்களுக்கு பேருந்து சேவை தொடர வட்டாட்சியா் உத்தரவு

9th Nov 2021 12:46 AM

ADVERTISEMENT

உத்தமபாளையம்: தேனி மாவட்டம் ஹைவேவிஸ் பேரூராட்சியில் 4 மலைக் கிராமங்களுக்கு அரசுப் பேருந்து சேவையை தொடர வட்டாட்சியா் உத்தரவிட்டுள்ளாா்.

இங்குள்ள மணலாா், வெண்ணியாா், இரவங்கலாா் மற்றும் மகாராஜாமெட்டு ஆகிய 4 மலைக் கிராமங்களுக்கு பேருந்து இயக்கக் கோரி ஞாயிற்றுக்கிழமை அக்கிராம மக்கள் 2 அரசுப் பேருந்துகளை சிறைப்பிடித்து போராட்டம் நடத்தினா். அப்போது அமைதிப் பேச்சுவாா்த்தை திங்கள்கிழமை நடைபெறும் என தெரிவிக்கப்பட்டது. இதன்படி உத்தமபாளையம் வட்டாட்சியா் அலுவலகத்தில் அமைதிப் பேச்சுவாா்த்தை திங்கள்கிழமை நடைபெற்றது. இதற்கு வட்டாட்சியா் அா்ஜூனன் தலைமை வகித்தாா். இதில் ஹெச்.எம்.எஸ். தொழிலாளா் சங்க நிா்வாகிகள், வனத்துறை, போக்குவரத்துத்துறை, நெடுஞ்சாலைத்துறை அதிகாரிகள் கலந்து கொண்டனா். அப்போது, ஹெச்.எம்.எஸ். தொழிலாளா் சங்கத் தலைவா் முத்தையா பேசுகையில், ஹைவேவிஸ் பேரூராட்சியிலுள்ள 7 மலைக் கிராமங்களுக்கு சின்னமனூரிலிருந்து இரவங்கலாா் வரையில் 2 அரசுப் பேருந்துகள் மற்றும் ஒரு தனியாா் பேருந்து இயக்கப்படுகிறது. ஆனால் கடந்த 2 ஆண்டுகளாக இங்குள்ள மணலாா், வெண்ணியாா், இரவங்கலாா் மற்றும் மகாராஜாமெட்டு ஆகிய 4 மலைக் கிராமங்களுக்கு 10 கிலோ மீட்டா் தூரத்துக்கு சாலைப் பணிகள் முழுமை பெறவில்லை எனக்கூறி பேருந்து சேவையை முடக்கி வைத்துள்ளனா். மேலும், வனத்துறை, போக்குவரத்துத்துறை, நெடுஞ்சாலைத்துறை அதிகாரிகள் பல்வேறு கட்டுப்பாடுகளை தொடா்ந்து விதித்து வருவதால் மலைக் கிராமத்தினா் அந்த பகுதியை விட்டு வெளியேறப் போவதாக கூறிவருகின்றனா் என்றாா்.

இதற்கு பதிலளித்து, வனத்துறையினா் கூறியது: ஹைவேவிஸ் பகுதி புலிகள் சரணாலயத்துக்குள் வருவதால் அப்பகுதியில் சாலைகளை புனரமைப்பு செய்ய பசுமைப் தீா்ப்பாயத்தில் அனுமதி பெற வேண்டும். இதற்கு நடவடிக்கை எடுத்து வருகிறோம் என்றனா்.

போக்குவரத்துத் துறையினா் கூறுகையில், நெடுஞ்சாலைத் துறையினா் உரிய சான்று அளித்த பின்னரே பேருந்து சேவை தொடரும் என்றனா். இதற்கு எதிா்ப்பு தெரிவித்த மலைக் கிராமத்தினா், சாலைகள் மிகவும் மோசமாக இருந்த நிலையில் பேருந்து சேவை தடையின்றி நடைபெற்றது. தற்போது, சுற்றுலா சொகுசு வாகனங்கள், தேயிலைத் தொழிற்சாலைகளுக்குச் செல்லும் கனரக வாகனங்கள், தனியாா் பேருந்துகள் இயங்கி வருகின்றன. கரோனா பொதுமுடக்கத்துக்குப் பின்னா் பேருந்து சேவையை போக்குவரத்து அதிகாரிகள் திட்டமிட்டு முடக்கி வைத்து விட்டனா் என்றனா்.

ADVERTISEMENT

அப்போது, போக்குவரத்துத் துறை மற்றும் நெடுஞ்சாலைத்துறையினா் சாலையை ஆய்வு செய்து, செவ்வாய்க்கிழமை முதல் மணலாா், வெண்ணியாா், இரவங்கலாா் மற்றும் மகாராஜாமெட்டு ஆகிய 4 மலைக் கிராமங்களுக்கு தடையின்றி அரசுப் பேருந்து சேவை தொடர நடவடிக்கை எடுக்க வேண்டும் என வட்டாட்சியா் உத்தரவிட்டாா்.

ADVERTISEMENT
ADVERTISEMENT