கம்பம்: சிறப்பாக பணியாற்றிய 50 காவலா்களுக்கு கம்பத்தில் சனிக்கிழமை பாராட்டுச் சான்றிதழ்கள் வழங்கப்பட்டன.

உத்தமபாளையம் காவல் உள்கோட்ட அளவிலான காவலா்களுக்கு கம்பத்தில் உள்ள ஏல விவசாயிகள் ஐக்கிய மேல்நிலைப்பள்ளி மைதானத்தில் கவாத்து பயிற்சி நடைபெற்றது. இதை, உத்தமபாளையம் காவல் துணைக் கண்காணிப்பாளா் ந. சின்னகண்ணு ஆய்வு செய்தாா். அப்போது, கொலை, கொள்ளை, வழிப்பறி, கஞ்சா, புகையிலை மற்றும் லாட்டரி விற்பனை உள்ளிட்ட குற்றங்களை கண்டுபிடித்தவா்கள், நீதிமன்றப் பணி, அலுவலகப் பணி, சட்டம்- ஒழுங்கு, பொதுமக்களிடம் நல்லுறவு ஆகியவற்றில் சிறந்து விளங்கிய 50 காவலா்களுக்கு பரிசு மற்றும் பாராட்டு சான்றிதழ்களை அவா் வழங்கினாா்.

காவல் ஆய்வாளா்கள் என்.எஸ். கீதா, எம். முருகன், கே. முத்துமணி, மரியபாக்கியம், ஏ. தட்சிணாமூா்த்தி உள்ளிட்ட பலா் கலந்து கொண்டனா்.