கேரள மாநிலம் இடுக்கி மாவட்டம் குமுளி, போடிமெட்டு, சின்னாா் சோதனைச் சாவடிகளில் இயங்கி வந்த கரோனா பரிசோதனை முகாம் வியாழக்கிழமை முதல் அகற்றப்பட்டது.

தமிழக-கேரள எல்லையில் உள்ள இடுக்கி மாவட்டத்தில் கரோனா தொற்று தொடா்பாக, குமுளி, கம்பம் மெட்டு போடிமெட்டு சின்னாா் ஆகிய எல்லைப் பகுதிகளில் கேரள அரசின் சுகாதாரம், வருவாய், உள்ளாட்சி நிா்வாக அதிகாரிகள் பரிசோதனை மற்றும் ஆவண சரிபாா்ப்பு முகாம்கள் அமைக்கப்பட்டிருந்தன. இந்த முகாம் மூலம் வெளி மாநிலங்களிலிருந்து கேரளத்துக்கு வருபவா்களை சோதனை செய்து வந்தனா்.

தற்போது கேரளத்தில் கரோனா தொற்று குறைந்து வருவதால், அம்மாநில நிா்வாகம் பல்வேறு தளா்வுகளை ஏற்படுத்தி வருகிறது.

இதில் வியாழக்கிழமை முதல் குமுளி, கம்பம் மெட்டு, போடிமெட்டு சின்னாா் ஆகிய எல்லை சோதனைச் சாவடிகளில் மருத்துவ முகாம் மற்றும் ஆவணங்களை சரிபாா்த்தல் முகாம்களை இடுக்கி மாவட்ட நிா்வாகம் அகற்றியது. வெள்ளிக்கிழமை முதல் தமிழகம் உள்ளிட்ட வெளி மாநிலங்களில் இருந்து வருவோா் வழக்கம்போல தளத்தில் பதிவு செய்த நகலோடும், சபரிமலை வரும் பக்தா்கள் ‘வொ்ச்சுவல் க்யூ சிஸ்டம்’ மூலம் பதிவு செய்த நகலுடனும் வரவேண்டும். அதை பரிசோதிக்கும் பொறுப்பு முகாம் அதிகாரிகளுக்கு பதிலாக போலீஸாரிடம் ஒப்படைக்கப்பட்டுள்ளது.

அதே நேரத்தில் கம்பம்மெட்டு சோதனைச்சாவடியில் வழக்கம்போல முகாம் இயங்கும் என இடுக்கி மாவட்ட ஆட்சியா் தினேஷன் தெரிவித்தாா்.

இது குறித்து ஏலத்தோட்ட விவசாயி ஜீவரத்தினம் கூறியது: எல்லைப் பகுதிகளில் தளா்வுகள் ஏற்படுத்திய இடுக்கி மாவட்ட நிா்வாகம், அதேபோல் பொதுப் போக்குவரத்தை தொடங்கி இரு மாநிலங்களிடையே பேருந்துகளையும் இயக்க அனுமதிக்க வேண்டும் என்றாா்.