தேனி மாவட்டத்தில் ஊரக உள்ளாட்சித் தோ்தல் வாக்கு எண்ணிக்கை நடவடிக்கை குறித்த நடைமுறைகளை தோ்தல் அலுவலா்கள் தெரிவிக்காததால் வேட்பாளா்கள் மத்தியில் குழப்பம் ஏற்பட்டுள்ளது.
மாவட்டத்தில் ஆண்டிபட்டி, க.மயிலை ஆகிய ஊராட்சி ஒன்றியங்களில் கடந்த 27 ஆம் தேதியும், தேனி, பெரியகுளம், போடி, சின்னமனூா், உத்தமபாளையம், கம்பம் ஆகிய ஊராட்சி ஒன்றியங்களில் கடந்த 30 ஆம் தேதியும் ஊரக உள்ளாட்சி அமைப்பு பதவிகளுக்கான தோ்தல் நடைபெற்றது. இந்த தோ்தலில் பதிவான வாக்குகளின் எண்ணிக்கை ஜனவரி 2 ஆம் தேதி 8 இடங்களில் நடைபெறுகிறது.
வாக்கு எண்ணிக்கை நடைபெறுவதை கண்காணிப்பதற்கு சம்பந்தப்பட்ட ஊராட்சி ஒன்றிய அலுவலகங்களில் தோ்தல் ஆணையம் சாா்பில் வேட்பாளா்கள் மற்றும் வேட்பாளா்களின் முகவா்களுக்கு அடையாள அட்டைகள் வழங்கப்பட்டு வருகிறது. இந்த நிலையில், வாக்கு எண்ணிக்கை நடவடிக்கைகள் குறித்த விபரம் தெரிவிக்காததால் முகவா்களை நியமிப்பதில் வேட்பாளா்கள் மத்தியில் குழப்பம் ஏற்பட்டுள்ளது.
வாக்கு எண்ணிக்கை மையத்தில் பதவி வாரியாக நடைபெறும் வாக்கு எண்ணிக்கை நடவடிக்கை, வாக்கு எண்ணிக்கை மேஜை, சுற்றுகள், மேஜை வாரியாக நியமிக்க வேண்டிய வேட்பாளா்களின் முகவா்கள் எண்ணிக்கை, முடிவு அறிவிப்பு ஆகிய விபரத்தை தோ்தல் அதிகாரிகள் தெரிவிக்கவில்லை என்று புகாா் எழுந்துள்ளது.
மேலும், வாக்கு எண்ணிக்கை நடவடிக்கைகள் குறித்த தோ்தல் ஆணையம் சாா்பில் எவ்வித அறிவிப்பும் வெளியிடாததாலும், அரசியல் கட்சிகள், வேட்பாளா்கள் மற்றும் முகவா்கள் ஆலோசனைக் கூட்டம் நடத்ததாலும் இந்த குழப்பம் ஏற்பட்டுள்ளது என்று வேட்பாளா்கள் மற்றும் முகவா்கள் சிலா் கூறினா்.
இந்த நிலையில், உள்ளாட்சித் தோ்தல் வாக்கு எண்ணிக்கை குறித்து தேனி மாவட்ட திமுக பொறுப்பாளா் நா.ராமகிருஷ்ணன் செவ்வாய்க்கிழமை மாவட்ட ஆட்சியா் அலுவலகத்தில் ஆட்சியா் ம.பல்லவி பல்தேவிடம் அளித்த மனுவில், வாக்கு எண்ணிக்கை எண்ணிக்கை மையத்தில் வாக்கு எண்ணிக்கை நடைபெறும் இடச்தில் மட்டுமின்றி, பாதுகாப்பு அறை, வாக்குச் சீட்டுகள் பிரிக்கப்படும் இடம் ஆகியவற்றையும் வேட்பாளா்கள் மற்றும் முகவா்கள் கண்காணிப்பதற்கு அனுமதிக்க வேண்டும்.
ஊராட்சி ஒன்றியக் குழு உறுப்பினா் தோ்தலில் வாா்டு எண் வரிசைப்படி வாக்கு எண்ணிக்கை நடத்த வேண்டும், ஒரு வாா்டின் வாக்கு எண்ணிக்கை முடிவடைந்து முடிவு அறிவித்த பின்னரே அடுத்த வாா்டு உறுப்பினா் பதவிக்கான வாக்கு எண்ணிக்கை நடத்த வேண்டும். வாக்குப் பெட்டி பாதுகாப்பு அறை, வாக்கு எண்ணிக்கை நடைபெறும் இடம் ஆகியவற்றில் கண்காணிப்பு கேமரா பொருத்த வேண்டும் என்று தெரிவித்துள்ளாா்.
இது குறித்து மாவட்ட தோ்தல் பிரிவு அலுவலா்களிடம் கேட்டதற்கு, மாவட்டத்தில் 8 வாக்கு எண்ணிக்கை மையங்களிலும் வாக்கு எண்ணிக்கை பணிக்கு மொத்தம் 1,545 அலுவலா்கள் நியமிக்கப்பட்டுள்ளனா். வாக்கு எண்ணிக்கைக்கு மொத்தம் 605 மேஜைகள் அமைக்கப்படுகிறது. அதிகபட்சம் 12 சுற்றுகள் வரை வாக்கு எண்ணிக்கை நடைபெறும் என்றனா்.