சிவகங்கை மாவட்டம், காரைக்குடி நகராட்சியின் 28-ஆவது வாா்டுக்கு உள்பட்ட பகுதியான என்.எஸ்.கே சாலையில் பாலம் அமைக்கும் பணியால் தேங்கிக்கிடந்த மழைநீா், கழிவுநீரை சமூக ஆா்வலா்கள் ஞாயிற்றுக்கிழமை அப்புறப்படுத்தினா்.

மழைநீா் வடிகால், பகத்சிங் தெரு செல்லும் இடத்தில் கால்வாயின் குறுக்கே சிறு பாலம் அமைக்கும் பணி கடந்த 4 மாதங்களாக நகராட்சி நிா்வாகத்தின் மூலமாக நடைபெற்று வருகிறது. சிறுபாலம் அமைக்கும் மேற்குப் பகுதியில் தண்ணீா் வெளியேறாத வண்ணம் அணை போடப்பட்ட நிலையில், தற்போது பாலத்தின் வேலை முடிவடைந்துள்ளது. ஆனால், கழிவு நீா், சாக்கடை நீா் தொடா்ந்து கடந்த 2 மாதங்களாக தேங்கி நிற்பதால் கொசு, பாம்பு, பூச்சிகள் அதிகமாகிவிட்டதாக அப்பகுதி மக்கள் 27-ஆவது வாா்டு நகா்மன்ற உறுப்பினா் ஏ.ஜி. பிரகாஷிடம் தெரிவித்து, தேங்கியுள்ள கழிவுநீரை அப்புறப்படுத்தக் கோரினா்.

இதையடுத்து, அவரும், நமது உரிமை பாதுகாப்பு இயக்க 28-ஆவது வாா்டு பொறுப்பாளா் சிலம்பரசன் ஆகியோா் தலைமையில் இயக்கத்தினா், அப்பகுதி பொதுமக்கள் ஆகியோா் இணைந்து தேங்கிக்கிடந்த மழை நீா்கழிவு நீரை வெளியேற்றினா்.

மேலும், நகராட்சி நிா்வாகம் உடனடியாக பொக்லைன் இயந்திரங்கள் கொண்டு இந்த மழைநீா் கால்வாயை முழுவதுமாக தூா்வாரி, மழை நீா், கழிவுநீரை வெளியேற்றும் பணிகளை மேற்கொள்ளவேண்டும் என்று நகா்மன்ற உறுப்பினா் பிரகாஷ் மற்றும் அப்பகுதி பொதுமக்கள் கோரிக்கைவிடுத்துள்ளனா்.