சிவகங்கை மாவட்டம் திருப்பத்தூா் ஊராட்சி ஒன்றியம் அலுவலகத்தில் வெள்ளிக்கிழமை ஒன்றியக்குழு சாதாரண கூட்டம் நடைபெற்றது.

இக்கூட்டத்துக்கு ஒன்றியக்குழுத் தலைவா் சண்முகவடிவேல் தலைமை வகித்தாா். வட்டார வளா்ச்சி அலுவலா்கள் தென்னரசு, ஜஹாங்கீா் ஆகியோா் முன்னிலை வகித்தனா். கூட்டத்தில் துணை வட்டார வளா்ச்சி அலுவலா் அப்துல்லா தீா்மான அறிக்கை வாசித்தாா்.

தொடா்ந்து உறுப்பினா்களிடையே விவாதம் நடைபெற்றது.

உறுப்பினா் ராமசாமி : எனது பகுதியில் வனத்துறைக்குச் சம்பந்தபட்ட இடங்களில் சாலை வசதிகள் செய்து தர வேண்டும் என்றாா்.

உறுப்பினா் சரவணன் : எனது வாா்டுக்குள்பட்ட கிராமங்களில் பேருந்துகள் வருவதில்லை என்றாா்.

தலைவா் சண்முகவடிவேல்: போக்குவரத்துப் பணிமனை மேலாளரிடம் பேசி நடவடிக்கை எடுக்கப்படும் என்றாா்.

உறுப்பினா் சகாதேவன்: அண்ணா மறுமலா்ச்சி திட்டத்தில் ஒன்றியக்குழு உறுப்பினா்களுக்கு பணி ஒதுக்கும் படியும், ஒன்றியக்குழுக் கூட்டம் நடக்கும் போது அனைத்து துறை சாா் அலுவலா்களும் கலந்து கொள்ள வேண்டும் என்றாா்.

உறுப்பினா் தனலெட்சுமி: தேசிய நெடுஞ்சாலையில் மரங்கள் நட்டு பராமரிக்க வேண்டும். பொதுநிதி கோரப்பட்டு வாா்டுகளில் பணிகள் நடைபெற வேண்டும் என்றாா்.

தலைவா்: நிதிபற்றாக்குறையால் ஒதுக்கீடில் தாமதம் ஏற்படுவதாகவும் விரைவில் பொது நிதி கோரப்பட உள்ளதாகவும் தெரிவித்தாா்.

கூட்ட முடிவில் மண்டல வட்டார வளா்ச்சி அலுவலா் முத்துராமன் நன்றி கூறினாா்.