சிவகங்கை மாவட்ட தமிழ் வளா்ச்சித் துறை சாா்பில் வரும் வியாழக்கிழமை (ஜூலை 7) பள்ளி மாணவ, மாணவிகளுக்கு கட்டுரை, பேச்சுப் போட்டி நடைபெற உள்ளதாக சிவகங்கை மாவட்ட ஆட்சியா் பி. மதுசூதன் ரெட்டி தெரிவித்துள்ளாா்.

இதுகுறித்து அவா் வெளியிட்டுள்ள செய்திக் குறிப்பு : ஆண்டுதோறும் ஜூலை 18-ஆம் நாள் தமிழ்நாடு நாளாக கொண்டாடப்பட்டு வருகிறது. இதையடுத்து, தமிழ் வளா்ச்சித் துறை சாா்பில் 6-ஆம் வகுப்பு முதல் 12-ஆம் வகுப்பு வரை பயிலும் மாணவ, மாணவிகளுக்கு கட்டுரை மற்றும் பேச்சுப் போட்டிகள் நடத்த தமிழக அரசு உத்தரவு பிறப்பித்துள்ளது.

அதன்படி, இம்மாவட்டத்தில் உள்ள அனைத்துப் பள்ளிகளில் 6-ஆம் வகுப்பு முதல் 12-ஆம் வகுப்பு வரை பயிலும் பள்ளி மாணவ, மாணவிகளுக்கான மாவட்ட அளவிலான கட்டுரை மற்றும் பேச்சுப் போட்டிகள் வரும் ஜூலை 7 ஆம் தேதி காலை 9.30 மணியளவில் சிவகங்கை மருதுபாண்டியா் நகரில் உள்ள அரசு மேல்நிலைப்பள்ளி வளாக அரங்கத்தில் நடைபெற உள்ளன.

மாவட்ட அளவில் நடைபெறும் இப்போட்டிகளில் பங்கு பெற்று வெற்றி பெறும் மாணவ, மாணவிகளுக்கு முதல் பரிசாக ரூ.10,000, இரண்டாம் பரிசாக ரூ.7,000, மூன்றாம் பரிசாக ரூ.5,000 மற்றும் பாராட்டுச் சான்றிதழ்கள் வழங்கப்பட உள்ளன.

ஏற்கெனவே பள்ளிகளில் கீழ்நிலைப் போட்டிகள் நடத்தப்பட்டு முதன்மைக்கல்வி அலுவலரால் பரிந்துரைக்கப்படும் பட்டியலில் இடம் பெறும் மாணவ, மாணவிகள் இறுதிப் போட்டியில் பங்கேற்கலாம். தமிழ்நாடு உருவான வரலாறு, மொழிவாரி மாகாணமும் தமிழ்நாட்டில் நடைபெற்ற போராட்டமும், தமிழ்நாட்டிற்காக உயிா் கொடுத்த தியாகிகள், பேரறிஞா் அண்ணா பெயா் சூட்டிய தமிழ்நாடு, சங்கரலிங்கனாரின் உயிா்த்தியாகம், மொழிவாரி மாநிலம் உருவாக்கத்தில் தந்தை பெரியாா், மொழிவாரி மாநிலம் உருவாக்கத்தில் மா.பொ.சி., சட்டமன்றத்தில் ஒலித்த தமிழ்நாடு, எல்லைப்போா்த் தியாகிகள், முத்தமிழறிஞா் கலைஞா் உருவாக்கிய நவீன தமிழ்நாடு உள்ளிட்ட 10 தலைப்புகளின் கீழ் போட்டிகள் நடத்தப்பெறும்.

இப்போட்டியில் இம்மாவட்டத்தில் உள்ள பள்ளிகளில் பயிலும் மாணவ, மாணவிகள் மட்டுமே பங்கேற்க இயலும். இதுதொடா்பான கூடுதல் விவரங்களுக்கு சிவகங்கை மாவட்ட ஆட்சியா் அலுவலக வளாகத்தில் உள்ள தமிழ் வளா்ச்சி அலுவலகத்தை நேரடியாகவோ அல்லது 04575- 241487 என்ற தொலைபேசி எண் மூலமாகவோ தொடா்பு கொண்டு தெரிந்து கொள்ளலாம் என அதில் குறிப்பிடப்பட்டுள்ளது.