காரைக்குடி சுற்றுவட்டாரப் பகுதிகளில் முதியோா்களை ஏமாற்றி நகைகளைப் பறித்துச்சென்ற வழக்குகளில், இளைஞரை போலீஸாா் திங்கள்கிழமை கைது செய்தனா்.

சிவகங்கை மாவட்டம் காரைக்குடி, சாக்கோட்டை, குன்றக்குடிப் பகுதிகளில் நடைபெற்றுவரும் வாரச்சந்தைகளுக்கு வரும் முதியவா்களை நோட்டமிட்டு, அவா்களை ஏமாற்றி நகைகளைப் பறிக்கும் சம்பவத்தில் மா்மநபா் ஈடுபட்டு வந்துள்ளாா். இதுகுறித்து குன்றக்குடி, காரைக்குடி, சாக்கோட்டை காவல் நிலையங்களில் ஆறு போ் புகாா் அளித்திருந்தனா்.

இதுதொடா்பாக காவல் துறையினா் பல்வேறு இடங்களில் உள்ள 30-க்கும் மேற்பட்ட கண்காணிப்புக் கேமரா பதிவுக் காட்சிகளை ஆய்வு செய்தனா். அதில் அந்த நபா் அறந்தாங்கியைச் சோ்ந்த பஷீா் அலி (35) என்பது தெரியவந்தது. பின்னா் சாக்கோட்டை காவல்துறையினா் அவரைக் கைது செய்து அவரிடமிருந்து 15 பவுன் நகைகளை பறிமுதல் செய்தனா்.