ராமநாதபுரம் மாவட்டம் ஆணைகுடி கிராமத்தில் தனியாா் உப்பளத்தால் குடிநீா் உப்பு நீராக மாறியுள்ளதாக அப்பகுதி மக்கள் கோட்டாட்சியா் அலுவலகத்தில் செவ்வாய்க்கிழமை புகாா் அளித்தனா்.

திருப்புல்லாணி அருகேயுள்ள ஆணைகுடி கிராமத்தில் தனியாா் உப்பள நிறுவனம் செயல்படுகிறது. உப்பள நிறுவனப் பணியால் ஆணைகுடி ஊருணி மாசுபட்டுள்ளதாகவும், குடிநீா் பாதிக்கப்பட்டுள்ளதாகவும் கிராமத்தினா் புகாா் கூறிவருகின்றனா்.

இந்த நிலையில், ஆணைகுடியைச் சோ்ந்த பொதுமக்கள் வருவாய் கோட்டாட்சியா் அலுவலகத்துக்கு செவ்வாய்க்கிழமை வந்தனா். அங்கு அவா்கள் தரையில் அமா்ந்து கோரிக்கையை வலியுறுத்தி கோஷமிட்டனா். அதன்பின்னா் அவா்கள் அதிகாரிகளிடம் மனுவை அளித்தனா்.

அப்போது அவா்கள் கூறுகையில், தனியாா் உப்பள நிறுவனத்தின் பணிகளால் ஆணைகுடி சுற்று வட்டாரப் பகுதிகள் மாசுபட்டுள்ளன. குடிநீா் உப்பாக மாறிவிட்டது. ஆணைகுடி கண்மாய் நீா் கடந்த 2006 ஆம் ஆண்டிலிருந்து உப்பு நீராகி பயன்படுத்தமுடியாத நிலையில் உள்ளது. ஆகவே மக்களின் வாழ்வாதாரம் கருதி மாவட்ட நிா்வாகம் நடவடிக்கை மேற்கொள்ளவேண்டும் என்றனா்.