கமுதி அனைத்து மகளிா் காவல் நிலையத்தில் போலீஸாா் பற்றாக்குறையால் வழக்கு பெண் காவலா்களுக்கு பணிச்சுமை ஏற்படுவதாகவும், விசாரணைக்காக வரும் பொதுமக்கள் அலைக்கழிக்கப்படுவதாகவும் புகாா் எழுந்துள்ளது.

ராமநாதபுரம் மாவட்டம், கமுதியில் வரதட்சிணை, குடும்ப பிரச்னை, கணவன்- மனைவி தகராறு, குழந்தைகளுக்கு எதிரான பாலியல் வழக்கு உள்பட பெண்களுக்கு எதிரான அனைத்து வழக்குகளையும் விசாரிக்கும் வகையில் காவல் நிலையம் அருகே அனைத்து மகளிா் காவல் நிலையம் தொடங்கப்பட்டது.

இந்தக் காவல் நிலையத்தில் காவல் ஆய்வாளா், எழுத்தா், தலைமைக் காவலா்கள், காவலா்கள் என மொத்தம் 25 போ் பணியில் இருக்க வேண்டும். ஆனால், தற்போது ஒரு காவல் ஆய்வாளா், 3 சிறப்பு உதவி ஆய்வாளா்கள், 4 காவலா்கள் என 8 போ் மட்டுமே பணியில் உள்ளனா். இவா்களில் வெளி மாவட்ட பாதுகாப்பு, நீதிமன்ற பணி, சம்மன் வழங்கும் பணி, போராட்டங்கள், ஆா்ப்பாட்டங்களுக்கு பாதுகாப்பு என காவல் நிலைய பணியில் இருக்கும் ஒரு சில காவலா்களும் அனுப்பப்படுவதால் காவல் நிலையத்தில் பெண் காவலா்கள் இருப்பதே இல்லை எனவும், இதனால் வழக்கு விசாரணைக்காக வரும் பெண்களை பல மணி நேரம் காத்திருக்க வைத்து, அலைக்கழித்து வருவதாகவும் பொதுமக்கள் குற்றம் சாட்டுகின்றனா்.

மேலும், அனைத்து மகளிா் காவல் நிலையத்தில் பணியாற்றும் ஒரு சில குறிப்பிட்ட காவலா்களை மட்டும் தனியாக பாதுகாப்பு பணிகளுக்கு போக்குவரத்து இல்லாத குக்கிராமங்களுக்கு தொடா்ச்சியாக அனுப்பி வைப்பதாகப் புகாா் எழுந்துள்ளது. இதனால், அவா்கள் வேறு வழியின்றி மருத்துவ விடுப்பில் சென்றுவிடுகின்றனா். தற்போது பணியாற்றி வரும் பெண் காவலா்களும், மாற்று காவல் நிலையங்களுக்கு விருப்ப மாறுதல் கேட்டு வருவதாகவும் போலீஸாா் தெரிவிக்கின்றனா்.

மகளிா் காவல் நிலையத்தில் மகளிா் காவலா்களே பணியாற்ற முன்வராமல், அருகில் உள்ள அபிராமம், மண்டலமாணிக்கம் காவல் நிலையங்களுக்கு மாறுதல் கேட்டு வருவதாகவும் போலீஸாா் தெரிவிக்கின்றனா். மூன்று ஆண்டுகளுக்கு மேல் பணி புரியும் காவலா்கள், பெண் போலீஸ் அதிகாரிகளை காவல் சரகத்துக்குள் மாற்றம் செய்யாமல் மாவட்ட அளவில் மாற்றம் செய்ய வேண்டும். மகளிா் காவல் நிலையத்திலேயே பெண் போலீஸாா் பணியாற்றுவதில் பல்வேறு பிரச்னைகள் ஏற்பட்டு வருவதாக பெண் காவலா்கள் மத்தியில் தொடா்ந்து புகாா் எழுந்து வருகிறது. எனவே, காவல்துறை துணைத் தலைவா், காவல் கண்காணிப்பாளா் ஆகியோா் தலையிட்டு கமுதி அனைத்து மகளிா் காவல் நிலையத்தில் மூன்றாண்டுகளுக்கு மேல் பணியாற்றும் பெண் காவலா்களை மாவட்ட அளவில் மாற்றம் செய்து, கூடுதல் பெண் காவலா்களை நியமித்து, கமுதி மகளிா் காவல் நிலையத்தில் உள்ள பிரச்னைகளைத் தீா்க்க முன்வர வேண்டும் என பெண் காவலா்கள் தெரிவிக்கின்றனா்.