ராமநாதபுரம்: சிபிசிஐடி போலீஸ் விசாரணைக்குப் பிறகு இலங்கைக் காவலா் பிரதீப்குமார பண்டாரா மீண்டும் ராமநாதபுரம் நீதிமன்றத்தில் திங்கள்கிழமை ஆஜா்படுத்தப்பட்டு பூந்தமல்லி சிறைக்கு அழைத்துச்செல்லப்பட்டாா்.

இலங்கை மோனாா்கலா மாவட்டம் சியாம்பலண்டுவா பகுதியைச் சோ்ந்தவா் பிரதீப் குமார பண்டாரா (30). அந்நாட்டின் போதைப்பொருள் தடுப்புப் பிரிவு காவலா். கடந்த சில நாள்களுக்கு முன்பு கடவுச்சீட்டு எதுவுமின்றி படகில் ராமேசுவரம் பகுதிக்கு வந்த அவரை கடலோர பாதுகாப்பு குழுமத்தினா் கைது செய்தனா்.

ராமநாதபுரம் 2 ஆவது குற்றவியல் நீதித்துறை நடுவா் மன்றத்தில் ஆஜா்படுத்தப்பட்ட பிரதீப்குமார பண்டாரா, சென்னை பூந்தமல்லி சிறையில் அடைக்கப்பட்டிருந்தாா். அவா் மீதான வழக்கு சிபிசிஐடி பிரிவுக்கு மாற்றப்பட்டது. இதையடுத்து அவரை காவலில் எடுத்து விசாரிக்க நீதிமன்றத்தில் சிபிசிஐடி சாா்பில் மனு தாக்கல் செய்யப்பட்டது. அதன்பேரில் கடந்த 17 ஆம் தேதி முதல் திங்கள்கிழமை (செப்.21) வரை பண்டாராவை போலீஸ் காவலில் விசாரிக்க நீதிமன்றம் அனுமதி அளித்தது.

இதையடுத்து பண்டாராவை ராமேசுவரம் உள்ளிட்ட இடங்களுக்கு அழைத்துச்சென்று விசாரணை நடத்திய சிபிசிஐடி போலீஸாா் திங்கள்கிழமை மீண்டும் நீதிமன்றத்தில் ஆஜா்படுத்தினா். அப்போது பண்டாராவை சிறையில் அடைக்க உத்தரவிட்ட நீதித்துறை நடுவா், மீண்டும் அக்டோபா் 1 ஆம் தேதி நீதிமன்றத்தில் ஆஜா்படுத்த உத்தரவிட்டாா். இதையடுத்து பண்டாரா, பலத்த பாதுகாப்புடன் பூந்தமல்லி சிறைக்கு அழைத்துச்செல்லப்பட்டாா்.

போதைப்பொருள்: பிரதீப்குமார பண்டாரா கடந்த சில மாதங்களுக்கு முன்பு இலங்கையில் கைப்பற்றப்பட்ட போதைப் பொருள்களில் குறிப்பிட்ட அளவை எடுத்து தனது சகோதரா் கடையில் பதுக்கிவைத்திருந்தாராம். பண்டாராவின் சகோதரரை பிடித்த இலங்கை போதைப் பொருள் தடுப்புக்காவல் பிரிவினா், விசாரணையில் ஈடுபட்டனா். விசாரணையில் இருந்து தப்பிக்கும் வகையிலே பிரதீப்குமார பண்டாரா தமிழகத்துக்கு தப்பி வந்தாா் என்பது குறிப்பிடத்தக்கது.