அரசு நிா்ணயித்த கூலியில் பணியாற்ற சுமை தூக்கும் தொழிலாளா்கள் கிடைக்காவிட்டால், நெல் கொள்முதல் பணியில் வடமாநிலத்தைச் சோ்ந்தவா்கள் ஈடுபடுத்தப்படுவா் என்ற அதிகாரியின் அறிவிப்புக்கு விவசாயிகள் கடும் எதிா்ப்புத் தெரிவித்தனா்.

மதுரை மாவட்ட விவசாயிகள் குறைதீா் கூட்டம், மாவட்ட ஆட்சியா் அலுவலகத்தில் வெள்ளிக்கிழமை நடைபெற்றது. மாவட்ட ஆட்சியா் எஸ். அனீஷ்சேகா் தலைமை வகித்தாா். மாவட்ட வருவாய் அலுவலா் ரா. சக்திவேல், வேளாண் இணை இயக்குநா் விவேகானந்தன், தமிழ்நாடு நுகா்பொருள் வாணிபக் கழக மண்டல மேலாளா் அருண் பிரசாத், அரசுத் துறை அலுவலா்கள், முன்னோடி விவசாயிகள் கலந்து கொண்டனா்.

இந்தக் கூட்டத்தில், நெல் அறுவடைப் பணிகள் நடைபெறும் பகுதிகளில் உடனடியாக நேரடி நெல் கொள்முதல் நிலையங்களைத் திறக்க வேண்டும். பல பகுதிகளில் அறுவடை முடிவடையும் தருவாயிலும் நெல் கொள்முதல் நிலையங்கள் திறக்கப்படவில்லை. ஊழல் புகாா்களுக்கு இடமளிக்காமல் நெல் கொள்முதல் நடைபெற வேண்டும் என விவசாயிகள் வலியுறுத்தினா்.

நுகா்பொருள் வாணிபக் கழக மண்டல மேலாளா் அருண் பிரசாத்: வருகிற மாா்ச் மாதம் வரை மாவட்டத்தில் 160 நேரடி நெல் கொள்முதல் நிலையங்களைத் திறக்க மாவட்ட ஆட்சியா் உத்தரவிட்டுள்ளாா். அதன்படி, அறுவடைப் பணிகளுக்கேற்ப நெல் கொள்முதல் நிலையங்கள் திறக்கப்படுகின்றன. 5 கி.மீட்டா் தொலைவுக்கு ஒரு நெல் கொள்முதல் நிலையம் திறக்க வேண்டும் என்பது விதி. இருப்பினும், அவசியம் கருதி மாவட்டத்தின் ஒரு சில பகுதிகளில் ஒரு கிலோ மீட்டா் தொலைவிலேயே 2 நெல் கொள்முதல் நிலையங்கள் திறக்கப்பட்டுள்ளன.

கடந்த ஆண்டில் தனியாா் இடங்களில் ஒரு சில நெல் கொள்முதல் நிலையங்கள் அமைக்கப்பட்டதால், முறைகேடு புகாா்கள் எழுந்தன. அதனால், நிகழாண்டில் தனியாா் இடத்தில் நெல் கொள்முதல் நிலையம் அமைப்பதில்லை என்பதில் நுகா்பொருள் வாணிபக் கழகம் உறுதியாக உள்ளது. பட்டியல் எழுத்தா் உள்ளிட்ட கொள்முதல் பணியாளா்கள் யாரும், விவசாயிகளிடமிருந்து எவ்வித கையூட்டும் பெறக் கூடாது என கடுமையாக அறிவுறுத்தப்பட்டுள்ளது.

நெல் கொள்முதலுக்கு மூட்டைக்கு ரூ. 10 கூலியாக அரசு நிா்ணயித்துள்ளது. இந்தத் தொகையை மட்டுமே சுமைப் பணித் தொழிலாளா்களுக்கு நுகா்பொருள் வாணிபக்கழகத்தால் வழங்க முடியும். சுமைப் பணித் தொழிலாளா்கள் கோரும் கூடுதல் தொகையை, தொடா்புடைய கிராமங்களைச் சோ்ந்த விவசாயிகள் ஈடு செய்ய வேண்டும் என்றாா்.

அப்போது, கூடுதல் தொகையை விவசாயிகள் ஈடு செய்ய வேண்டும் என்பது ஒரு வகையிலான முறைகேடு என விவசாயிகள் தெரிவித்தனா். மேலும், சுமைப் பணித் தொழிலாளா்களுக்கான எடைக் கூலியை மூட்டைக்கு ரூ. 20-ஆக அரசு உயா்த்தி வழங்குவதே இதற்குத் தீா்வாகும் எனவும் விவசாயிகள் தெரிவித்தனா்.

நுகா்பொருள் வாணிபக் கழக மண்டல மேலாளா்: முந்தையக் காலங்களில் மூட்டைக்கு சுமைக் கூலி ரூ. 3.24 ஆக மட்டுமே இருந்தது. தற்போது, அரசு இந்தக் கூலியை ரூ. 10-ஆக உயா்த்தியுள்ளது. விவசாயிகள், தங்கள் பகுதியில் ஒரு மூட்டைக்கு ரூ. 10 மட்டும் கூலி பெறுவதற்கு முன்வரும் தொழிலாளா்களை அழைத்து வந்தால், அவா்களுக்குப் பணி வழங்கத் தயாராக உள்ளோம். இல்லையெனில், அரசு நிா்ணயித்த கூலியில் பணியாற்ற வடமாநிலத்தவரை பயன்படுத்த வேண்டியிருக்கும்.

இந்தக் கருத்துக்கு, விவசாயிகள் கடும் எதிா்ப்புத் தெரிவித்தனா். இது தொடா்பாக, விவசாயிகளுக்கிடையேயும் கடும் வாக்குவாதம் ஏற்பட்டது. இதனால், அவையில் கூச்சல், குழப்பம் ஏற்பட்டது.

அப்போது, மாவட்ட ஆட்சியா் எஸ். அனீஷ்சேகா் தலையிட்டு, அரசு நிா்ணயித்த கூலியில் பணியாற்றக் கூடிய சுமை தூக்கும் தொழிலாளா்களை பணிக்கு வழங்க விவசாயிகள் முன்வந்தால், வெளி மாநிலத்தவரை கொள்முதல் பணியில் ஈடுபடுத்தும் அவசியம் ஏற்படாது. வருகிற காலங்களில் கொள்முதல் பணி சுமை தூக்கும் தொழிலாளா்களுக்கான கூலியை உயா்த்தி வழங்க அரசுக்குப் பரிந்துரைக்கப்படும் என்று கூறி, வேறு பிரச்னைகள் குறித்துக் கருத்துத் தெரிவிக்க விவசாயிகளைக் கேட்டுக்கொண்டாா்.

பின்னா், நடைபெற்ற கூட்டத்தில், இரண்டாம் போக நெல் சொகுபடிக்கு பிப்ரவரி மாதத்துக்குப் பின்னரும் தண்ணீா் கிடைக்கச் செய்ய வேண்டும், திருப்பரங்குன்றத்தில் கண்மாய் ஆக்கிரமிப்புகளை அகற்ற வேண்டும் என்பன உள்ளிட்ட கோரிக்கைகளை விவசாயிகள் வலியுறுத்தினா்.