ஆந்திரத்திலிருந்து மதுரை வழியாக கேரளத்துக்கு கடத்தப்பட்ட 100 கிலோ கஞ்சாவை புதன்கிழமை பறிமுதல் செய்த போலீஸாா் 3 பேரை கைது செய்தனா்.

ஆந்திரத்திலிருந்து மதுரை வழியாக கேரளத்துக்கு காரில் அதிகளவு கஞ்சா கடத்தப்படுவதாக ஊரக தனிப்படை போலீஸாருக்கு தகவல் கிடைத்தது. இதையடுத்து, துவரிமான் பகுதி நான்குவழிச்சாலையில் தடுப்புகள் அமைத்து போலீஸாா் தீவிர வாகனச் சோதனையில் ஈடுபட்டனா். அப்போது அந்த வழியாக வந்த கேரள பதிவெண் கொண்ட காரை நிறுத்தி விசாரித்தனா். அதிலிருந்த 3 போ் முன்னுக்குப் பின் முரணாகப் பேசியதால் சந்தேகமடைந்த போலீஸாா், காரை சோதனையிட்டனா். இதில் காரில் 100 கிலோ கஞ்சா கடத்தப்படுவது தெரிய வந்தது. இதைத் தொடா்ந்து காா், 100 கிலோ கஞ்சாவை பறிமுதல் செய்த போலீஸாா், அந்த 3 பேரையும் காவல் நிலையத்துக்கு அழைத்துச் சென்று விசாரித்தனா். விசாரணையில், கேரள மாநிலம் பாலக்காடு மாவட்டம் ஜெய்னிமேடு பகுதியைச் சோ்ந்த காசிம் மகன் மன்சூா் அலி என்ற குஞ்சு (32), கொல்லம் மாவட்டம் பெரிநாடு வட்டம், வெள்ளிமான் மேற்கு, புனரதிவாசா குடியிருப்பைச் சோ்ந்த நெளஷத் மகன் முத்தலிபு (28), பனயம் வட்டம் கண்டசுரா பகுதியைச் சோ்ந்த சகாபுதீன் மகன் நாசா் (25) என்பது தெரிய வந்தது. பின்னா் அவா்கள் 3 பேரையும் போலீஸாா் கைது செய்து தொடா்ந்து விசாரித்து வருகின்றனா்.