மதுரை

காந்தியடிகளின் அகிம்சைக் கொள்கைகள் உலகம் முழுவதும் பொருந்தக்கூடியவை: பூடான் முன்னாள் பிரதமா்

26th Sep 2022 12:09 AM

ADVERTISEMENT

காந்தியடிகளின் அகிம்சைக் கொள்கைகள், இந்தியா மட்டுமின்றி உலகம் முழுவதும் பொருந்தக்கூடியவை என்று பூடான் முன்னாள் பிரதமா் ஜிக்மி தின்லே தெரிவித்தாா்.

மதுரை காந்தி அருங்காட்சியகத்தில் நடைபெற்று வரும் அகிம்சை சந்தை நிகழ்ச்சியில் பூடான் முன்னாள் பிரதமா் ஜிக்மி தின்லே ஞாயிற்றுக்கிழமை பங்கேற்றாா். காந்தி அருங்காட்சியகம் மற்றும் அகிம்சை சந்தையை பாா்வையிட்ட அவா், செய்தியாளா்களிடம் கூறியது: உலகம் முழுவதும் தவறான வாழ்வியல் நடைமுறையை கையாண்டு வருகிறோம். இயற்கை வளங்களை சீரழிப்பது, இயற்கையை தவறாக கையாள்வது போன்றவற்றால் இயற்கை சூழலுக்கு கடும் பாதிப்பு ஏற்படுகிறது.

மேலும் தேவையற்றவைகளையும் நுகா்ந்து வருகிறோம். இந்தியாவில் உள்ள கிராமப்புறங்களில் வசிக்கும் மக்கள் இயற்கையோடு இணைந்த வாழ்க்கையை மேற்கொள்கின்றனா். கிராமப்புற வாழ்க்கையில், ஒருவருக்கொருவா் தங்கள் உற்பத்திப் பொருள்களை பரிமாறிக் கொண்டு நட்புடனும், அன்புடனும் வாழ்ந்து வருகின்றனா். தற்போது அகிம்சை சந்தையில் பாா்க்கும் ஒவ்வொன்றும் அடிமட்டத்தில் இருந்து வந்த யோசனைகளே.

காந்தியடிகள் கூறிய இயற்கைப் பொருளியல், அகிம்சை கொள்கைகள், இந்தியாவுக்கு மட்டுமின்றி உலகம் முழுவதும் பொருந்தக்கூடியவை. மேலும் அவரது கொள்கைகள் எந்தக் காலத்துக்கும் பொருந்தக்கூடியனவாக உள்ளன. காந்தியடிகளின் கொள்கைகளை கொண்டு செல்வதில் இளையதலைமுறை ஆா்வமுடன் செயல்பட வேண்டும். இளையதலைமுறையினா் தான் மாற்றத்துக்கான வித்துக்களாக உள்ளனா்.

ADVERTISEMENT

முந்தைய தலைமுறையினா் ஏராளமான தவறுகளை செய்துவிட்டனா். ஆனால் தற்போதைய இளையதலைமுறையினா் தவறுகளுக்கு எதிராக குரலெழுப்பி, எதிா்காலத்தை மீட்டெடுக்கும் செயல்பாடுகளில் இறங்கியுள்ளனா். காந்தியடிகளின் எண்ணங்கள் இந்தியாவில் மட்டுமின்றி பூடான் நாட்டின் மக்கள் மத்தியில் சிந்தனையிலும், சித்தாந்தத்திலும் மாற்றத்தை ஏற்படுத்தியுள்ளன.

பூடான் நாட்டில் ஒவ்வொரு நாளும் போராட்டமாகத்தான் அமைகிறது. 10 ஆண்டுகளுக்கு முன்பு 25 சதவீத மக்கள் வறுமைக்கோட்டுக்கு கீழ் இருந்தனா். கல்வி, பொருளாதாரம் போன்றவற்றிலும் பின்தங்கிய நிலை இருந்தது. தற்போது ஏழ்மை நிலையில் இருந்து விடுபட்டு உயா்வை கண்டுள்ளோம்.

எழுத்தறிவு விகிதம் அதிக அளவு உயா்ந்துள்ளது. பூடான் நாடு 72 சதவீதம் காடுகள் சூழ்ந்தது. பூடானில் வளா்ச்சியின் பெயரில் சுற்றுச்சூழலை அழிப்பதில்லை. தற்போது தெற்காசிய நாடுகளில் மூன்றாவது வளா்ந்த நாடாக பூடான் உள்ளது. குறைந்த அளவு காா்பன் வாயு வெளியிடுவதில் உலகத்துக்கு பூடான் முன்னோடியாகத் திகழ்கிறது என்றாா்.

ADVERTISEMENT
ADVERTISEMENT