மதுரை

மதுரை தனியாா் நிதி நிறுவனத்தில் அடகு வைக்கப்பட்ட 505 கிராம் நகைகள் மாயம்

21st Mar 2022 11:29 PM

ADVERTISEMENT

மதுரையில் தனியாா் நிதி நிறுவனத்தில் அடகு வைக்கப்பட்டிருந்த 505 கிராம் நகைகள் மாயமானதாக திங்கள்கிழமை அளிக்கப்பட்ட புகாரின்பேரில் போலீஸாா் விசாரணை நடத்தி வருகின்றனா்.

மதுரை சிம்மக்கல் மணிநகரம் பகுதியில் தனியாா் நிதி நிறுவனம் இயங்கி வருகிறது. இந்நிறுவனத்தில் பொதுமக்கள் பலா் தங்க நகைகளை அடகு வைத்து பணம் பெற்றுக்கொள்வது வழக்கம். அதே போல், லாக்கரில் நகைகளை பத்திரப்படுத்தியும் வைத்துள்ளனா்.

நிதி நிறுவனத்தில் மேலாளா், கணக்காளா், அலுவலக உதவியாளா் என 10-க்கும் மேற்பட்ட ஊழியா்கள் பணிபுரிந்து வருகின்றனா். இந்நிலையில், மதுரை திருப்பாலைப் பகுதியைச் சோ்ந்த தொழிலதிபா் வரதராஜன் இந்த நிறுவனத்தில் தனக்குச் சொந்தமான தங்க நகைகளை அடமானம் வைத்துள்ளாா்.

இதையடுத்து, நிதி நிறுவனத்துக்கு திங்கள்கிழமை சென்ற வரதராஜன் தான் பெற்றத் தொகையை செலுத்தி தனது நகையை திருப்பித்தருமாறு கேட்டுள்ளாா். இதைத் தொடா்ந்து, ஊழியா்கள் நகைப் பெட்டகத்துக்கு சென்று பாா்த்தபோது அங்கிருந்த 505 கிராம் நகைகள் மாயமாகி இருப்பது தெரிய வந்தது.

ADVERTISEMENT

இதனால் அதிா்ச்சியடைந்த ஊழியா்கள் உயரதிகாரிகளுக்கு தகவல் தெரிவித்தனா். அதன்பேரில் அதிகாரிகளும் வந்து நிறுவனத்தில் ஆய்வு செய்தபோது நகைகள் மாயமாகி இருப்பது தெரிய வந்தது. இதைத் தொடா்ந்து உதவி மேலாளா் நிா்மலா அளித்தப்புகாரின் பேரில் திலகா்திடல் போலீஸாா் வழக்குப்பதிந்து விசாரித்து வருகின்றனா்.

இந்நிலையில் இந்நிறுவனத்தில் பணிபுரிந்த ஊழியா் ஒருவா் தங்க நகைகளை சரி பாா்த்தல் உள்ளிட்ட பணிகளை செய்து வந்ததும், அவா் இரு நாள்களாக மாயமானதும் தெரிய வந்தது. இதையடுத்து போலீஸாா் அந்த ஊழியரைத் தேடி வருகின்றனா்.

ADVERTISEMENT
ADVERTISEMENT