மதுரையில் அடுக்குமாடி குடியிருப்பில் உள்ள வீட்டில் 170 கிலோ கஞ்சா பதுக்கிய வழக்கில் கைது செய்யப்பட்ட கணவா், மனைவி உள்ளிட்ட மூவருக்குச் சொந்தமான ரூ.5.50 கோடி மதிப்புள்ள சொத்துகள் போலீஸாரால் முடக்கப்பட்டுள்ளன.

மதுரை மாவட்டம், ஒத்தக்கடை காவல் நிலையத்துக்குள்பட்ட பகுதியில் உள்ள அடுக்குமாடி குடியிருப்பு வீட்டில் கஞ்சா பதுக்கி வைத்தாக கிடைத்த ரகசிய தகவலின் பேரில் கடந்த 2021 நவம்பா் 11 ஆம் தேதி ஒத்தக்கடை போலீஸாா் சோதனையிட்டனா். அப்போது அந்த வீட்டில் 170 கிலோ கஞ்சாவை பதுக்கி வைத்திருந்த முனிச்சாலை காமராஜா் சாலையைச் சோ்ந்த காளை, அவரது மனைவி பெருமாயி ஆகிய இருவரையும் போலீஸாா் கைது செய்தனா். இந்த வழக்கில் தலைமறைவாக இருந்த பேரையூா் காளப்பன்பட்டி கம்மாளப்பட்டியைச் சோ்ந்த அய்யா் என்பவா் மற்றொரு வழக்கில் கைது செய்யப்பட்டு புழல் ஜெயிலில் அடைக்கப்பட்டு இருந்தாா். அவரும் இந்த வழக்கிலும் கைது செய்யப்பட்டாா்.

இந்நிலையில் மூவரின் சொத்து விவரங்கள் சேகரிக்கப்பட்டன. இதன்படி மதுரை காமராஜா் சாலையில் உள்ள வீட்டடி மனை, காமராஜா் சாலையில் உள்ள 2 வீடுகள், மேலூா் சூரக்குண்டு கிராமத்தில் விவசாய நஞ்சை நிலம் 2.05 ஏக்கா், இலந்தைகுளம் கிராமத்தில் வீட்டடி மனை 742 சதுர அடி நிலம் மற்றும் அதில் கட்டப்பட்டுள்ள வீடு, முனிச்சாலையில் 3 அடுக்கு மாடி வீடு, முனிச்சாலையில் 160 சதுர அடி மனை, மேலூா் சூரக்குண்டு கிராமத்தில் விவசாய நிலங்கள் 136 செண்ட், மதுரை நகா் புதுமீனாட்சிநகா், வாா்டு எண் 52 இல் 3 மாடி வீடு, புதுமீனாட்சி நகரில் 2 மாடி வீடு, காமராஜா் சாலை சீனிவாச பெருமாள் கோவில் தெருவில் 3 மாடி வீடு உள்பட மொத்தம் ரூ.5 கோடியே 50 லட்சத்து 22 ஆயிரம் மதிப்புள்ள சொத்துகள் முடக்கப்பட்டுள்ளன.

கஞ்சா தொழில் செய்பவா்கள் மற்றும் அவா்களது உறவினா்களின் சொத்துக்களை முற்றிலுமாக முடக்க கடுமையான நடவடிக்கை எடுக்கப்படும். கஞ்சா வியாபாரிகள், கடத்துபவா்கள் மட்டுமின்றி அவா்களின் உறவினா்களின் சொத்துக்கள் அனைத்தும் சட்டப்படி முடக்க நடவடிக்கை மேற்கொள்ளப்படும் என்று தென் மண்டல காவல்துறைத்தலைவா் அஸ்ரா காா்க் எச்சரிக்கை விடுத்துள்ளாா்.