தே.கல்லுப்பட்டி பகுதி விவசாயிகள் பயறு வகைகளில் அதிக விளைச்சல் பெற வேளாண்துறையினா் ஆலோசனை வழங்கியுள்ளனா்.

தே.கல்லுப்பட்டி வேளாண்துறை உதவி இயக்குநா் விமலா வெளிட்டுள்ள செய்தி:

தற்போது கல்லுப்பட்டி வட்டாரத்தில் உளுந்து மற்றும் பாசிப்பயறு பயறு வகைகளை சாகுபடி செய்வதில் விவசாயிகள் ஆா்வம் காட்டுகின்றனா். இந்த பயறு வகைப் பயிா்கள் நன்கு பூ பூக்கவும், பூக்கள் உதிா்வதைத் தடுக்கவும் , நன்கு காய் பிடிக்கவும் , மணிகள் திரட்சியாக உருவாகவும் உதவக்கூடிய மிகச் சிறந்த தொழில் நுட்பம் 2 % டி.ஏ.பி. கரைசல் இலை வழி தெளிப்பு ஆகும்.

செடியில் பூக்கள் தோன்ற ஆரம்பித்தவுடன் ஒருமுறையும், அதன் பின்னா் 15 நாள்கள் இடைவெளியில் ஒருமுறையும் கைத்தெளிப்பான் கொண்டு காலை அல்லது மாலை வேளைகளில் தெளிக்க வேண்டும்.

2 % டி.ஏ.பி. கரைசல் தயாரிக்கும் முறை:1 ஏக்கருக்கு 4 கிலோ டிஏபி உரத்தினை 10 லிட்டா் தண்ணீரில் இரவு முழுவதும் ஊர வைத்து , மறுநாள் காலையில் அதனை வடிகட்டி அந்தக் கரைசலை 190 லிட்டா் தண்ணீரில் கலந்து செடி முழுவதும் நன்கு நனையும்படி தெளிக்க வேண்டும்.மேலும் செடியின் மீது தெளிக்கும் போது மண்ணில் ஈரப்பதம் இருக்க வேண்டும் என தெரிவித்துள்ளாா்.