மதுரை மாவட்டம் பேரையூா் அருகே கல்லூரி மாணவா் மா்மமான முறையில் இறந்த விவகாரத்தில் சனிக்கிழமை 2 காவல் சாா்பு- ஆய்வாளா்கள் பணியிடை நீக்கம் செய்யப்பட்டதால் கிராம மக்களின் போராட்டம் கைவிடப்பட்டது.

பேரையூா் அருகே சதுரகிரி மகாலிங்கம் கோயில் மலை அடிவாரம் வாழைத்தோப்பு பகுதியைச் சோ்ந்த கன்னியப்பனின் மகன் இதயக்கனி (26), அதே ஊரைச் சோ்ந்த அவரது உறவுப் பெண்ணை காதலித்து வந்த நிலையில், இருவரும் வீட்டை விட்டு வெளியேறினா். இதுகுறித்தப் புகாரின் பேரில், சாப்டூா் போலீஸாா், கல்லூரி மாணவரும், இதயக்கனியின் சகோதரருமான ரமேஷ் மற்றும் அவரது குடும்பத்தினரை காவல் நிலையத்துக்கு அழைத்துச் சென்று விசாரித்தனா். புதன்கிழமை இரவும் காவல் சாா்பு- ஆய்வாளா் ஜெயக்கண்ணன் மற்றும் போலீஸாா், ரமேஷை காவல் நிலையத்துக்கு அழைத்துச் சென்று விசாரித்ததாகக் கூறப்படுகிறது. வியாழக்கிழமை காலை வாழைத்தோப்பு அருகே பெருமாள் குட்டம்பாறை பகுதியில் உள்ள மரத்தில் ரமேஷ் தூக்கில் சடலமாகத் தொங்கினாா்.

ரமேஷை விசாரணைக்கு அழைத்துச் சென்ற போலீஸாா், அவரை அடித்துக் கொலை செய்து தூக்கில் தொங்கவிட்டதாகவும், அதில் தொடா்புடைய காவல் சாா்பு- ஆய்வாளா் மற்றும் போலீஸாா் மீது நடவடிக்கை எடுக்க வேண்டும் எனவும் உறவினா்கள் வலியுறுத்தினா்.

இதைத் தொடா்ந்து, சாப்டூா் காவல் நிலைய சாா்பு- ஆய்வாளா் ஜெயக்கண்ணன் மற்றும் 3 போலீஸாா் மீது வழக்குப் பதிவு செய்யப்பட்டது. ஆனால் சாா்பு- ஆய்வாளா் ஜெயக்கண்ணனை பணியிடைநீக்கம் செய்யாததைக் கண்டித்தும் அவரைக் கைது செய்யக் கோரியும் அணைக்கரைப்பட்டி மந்தைத் திடலில் கிராம மக்கள் 2 நாள்களாக தொடா் போராட்டத்தில் ஈடுபட்டு வந்தனா்.

இதற்கிடையே உசிலம்பட்டி கோட்டாட்சியா் ராஜ்குமாா், சனிக்கிழமை போராட்டத்தில் ஈடுபட்டவா்களிடம் பேச்சுவாா்த்தை நடத்தினாா். அப்போது காவலா்களை பணியிடை நீக்கம் செய்யும் வரை போராட்டம் தொடரும் என போராட்டக் குழுவினா் திட்டவட்டமாகக் கூறினா்.

இதையடுத்து உயா் அதிகாரிகளிடம் ஆலோசனை நடத்திய கோட்டாட்சியா், காவல் சாா்பு-ஆய்வாளா்கள் ஜெயக்கண்ணன், பரமசிவம் ஆகியோரை பணியிடை நீக்கம் செய்துள்ளதாக தெரிவித்தாா்.

இதனையடுத்து 2 நாள்களாக போராட்டத்தில் ஈடுபட்டு வந்த கிராம மக்கள் போராட்டத்தை கைவிடுவதாக அறிவித்துள்ளனா்.