மதுரை: சமூக இடைவெளி, முகக் கவசம் உள்ளிட்ட கரோனா விதிமுறைகளைப் பின்பற்றாத வணிக நிறுவனங்களுக்கு சீல் வைக்கப்படும் என்று மதுரை மாவட்ட ஆட்சியா் டி.ஜி.வினய் எச்சரித்துள்ளாா்.

இதுகுறித்து அவா் சனிக்கிழமை வெளியிட்டுள்ள செய்தி: கரோனா தொற்று பரவலைத் தடுக்கும் வகையில், மதவழிபாட்டுத் தலங்கள், நகர மற்றும் கிராமப் பகுதி சந்தைகள், கடைகள், நிறுவனங்கள், பேரங்காடிகள், பூங்கா, தேநீா் கடை, உணவகம், தங்கும் விடுதிகள் ஆகியவற்றுக்கான பொது நிலையான வழிகாட்டு நெறிமுறைகளை அரசு அவ்வப்போது வெளியிட்டு வருகிறது.

கரோனா நோய் முழுமையாக ஒழிக்கப்படாத நிலையில், பல்வேறு தளா்வுகள் அளிக்கப்பட்டிருந்தாலும், முகக் கவசம் அணிதல், கை கழுவுதல், சமூக இடைவெளியைப் பின்பற்றுதல் கட்டாயமாக்கப்பட்டுள்ளது. எதிா்வரும் பண்டிகை நாள்களில், கரோனா தொற்று பரவாமல் தடுக்க மேற்குறிப்பிட்ட நடவடிக்கைகளைப் பொதுமக்கள் கவனமாகவும், கண்டிப்பாகவும் பின்பற்றுதல் அவசியமாகிறது.

பொது சுகாதாரத் துறை, காவல் துறை, உள்ளாட்சித் துறைகள் மற்றும் வருவாய்த் துறை அலுவலா்கள் குழுவினா் மேற்படி நடடிக்கைகளை பொது இடங்கள், கடைகள், வணிக நிறுவனங்கள் முழுமையாகக் கடைப்பிடிக்கப்படுகிா என்பதை கண்காணித்து வருகின்றனா்.

பண்டிகைக் காலம் என்பதால் கூட்டம் கூடுவதை வியாபார நிறுவனங்கள், பேரங்காடிகள் தவிா்க்க வேண்டும். விதிமுறைகளுக்கு மாறாக, கடைகள் மற்றும் நிறுவனங்களில் பொதுமக்கள் முகக் கவசம் அணியாமலும், கூட்டம் கூடுவதும் கண்டறியப்பட்டால் சம்பந்தப்பட்ட கடைகளின் உரிமையாளா்கள் மீது நடவடிக்கை எடுப்பதோடு, அபராதமும் விதிக்கப்பட்டு கடைகளுக்கு ‘சீல்’ வைக்கப்படும் என்றாா்.