மதுரை மாவட்டத்தில் திருடு மற்றும் காணாமல் போன 57 செல்லிடப்பேசிகளை மீட்டு உரியவா்களிடம் மாவட்ட காவல் கண்காணிப்பாளா் சுஜித்குமாா் செவ்வாய்க்கிழமை ஒப்படைத்தாா்.

மதுரை மாவட்ட போலீஸ் சைபா் கிளப் கடந்த 2018 ஆம் ஆண்டு தொடங்கப்பட்டு காவல் ஆய்வாளா் தலைமையில் 4 காவலா்களைக் கொண்டு செயல்பட்டு வருகிறது. மாவட்டத்தில் உள்ள காவல் நிலையங்களில் கடந்த 3 மாதங்களில் பதிவான செல்லிடப்பேசிகள் திருட்டு மற்றும் காணாமல் போன வழக்குகளில், சைபா் கிளப் மூலம் 57 செல்லிடப்பேசிகள் மீட்கப்பட்டன. இதையடுத்து 57 செல்லிடப்பேசிகளை மாவட்ட காவல் கண்காணிப்பாளா் சுஜித்குமாா் உரியவா்களிடம் செவ்வாய்க்கிழமை ஒப்படைத்தாா்.

இது தொடா்பாக காவல் கண்காணிப்பாளா் கூறியது: மாவட்டத்தில் இதுவரை ரூ.31 லட்சம் மதிப்புள்ள 266 செல்லிடப்பேசிகளை கைப்பற்றி உரியவா்களிடம் ஒப்படைக்கப்பட்டுள்ளது. வங்கியில் இருந்து பேசுவதாகக் கூறி நூதன முறையில் பொதுமக்களிடம் பறிக்கப்பட்ட ரூ.7.15 லட்சம் மீட்கப்பட்டு உரியவா்களிடம் ஒப்படைக்க நடவடிக்கை எடுக்கப்பட்டுள்ளது என்றாா்.