மதுரை: மதுரையில் கள்ளநோட்டுகளை புழக்கத்தில்விட்ட 4 பேரை போலீஸாா் புதன்கிழமை கைது செய்து, ரூ.1 லட்சத்து 17 ஆயிரத்து 500 மதிப்பிலான 500 ரூபாய் கள்ள நோட்டுகளைப் பறிமுதல் செய்தனா். இதில் முக்கியக் குற்றவாளியைப் பிடிக்க போலீஸாா் ஒசூா் விரைந்துள்ளனா்.

மதுரை கூடல்புதூா் ராஜ் நகரைச் சோ்ந்தவா் உமாசந்திரா (43). இவா், நடத்தி வரும் மளிகைக் கடைக்கு செவ்வாய்க்கிழமை இரவு அதே பகுதியைச் சோ்ந்த காதா்பாட்சா (53) என்பவா் ரூ. 500 -ஐ கொடுத்து மளிகைப் பொருள்கள் வாங்கியுள்ளாா். அவா் கொடுத்தது, கள்ளநோட்டு என்பது தெரியவந்ததால், அருகில் உள்ளவா்கள் உதவியுடன் காதா்பாட்சாவை பிடித்து போலீஸாரிடம் உமாசந்திரா ஒப்படைத்தாா்.

விசாரணையில் மேலும், மூன்று ரூ.500 கள்ளநோட்டுகள் அவரிடம் இருந்தது தெரியவந்தது. இதுகுறித்த புகாரின் பேரில் கூடல்புதூா் போலீஸாா் வழக்குப் பதிவு செய்து விசாரித்தனா். மேலும் அவரது வீட்டில் நடத்தப்பட்ட சோதனையில் ரூ.17 ஆயிரத்து 500 மதிப்பிலான 500 ரூபாய் கள்ளநோட்டுகள் பறிமுதல் செய்யப்பட்டன.

தொடா் விசாரணை: கள்ளநோட்டு விவகாரத்தில், வேறு யாருக்கேனும் தொடா்பு உள்ளது என்பது குறித்து போலீஸாா் காதா் பாட்சாவிடம் விசாரணை மேற்கொண்டனா். அப்போது அவா் அளித்த தகவலின் பேரில், மதுரை சொக்கநாதபுரம் பகுதியைச் சோ்ந்த கண்ணன் மகன் மணி (48), சிவகங்கை மாவட்டம் திருப்புவனம் பகுதியைச் சோ்ந்த வேலாயுதம் மகன் ஈஸ்வரன் (36), மதுரை மீனாம்பாள்புரம் பகுதியைச் சோ்ந்த தங்கவேல் மகன் விக்னேஷ்குமாா் (34), தூத்துக்குடி டூ.வி.புரத்தைச் சோ்ந்த துரைசாமி மகன் குருமூா்த்தி (61) ஆகியோரை போலீஸாா் புதன்கிழமை கைது செய்து குருமூா்த்தியிடம் இருந்து 5 செல்லிடப்பேசிகள், இருசக்கரவாகனம் மற்றும் ரூ.1 லட்சம் மதிப்பிலான 500 ரூபாய் கள்ளநோட்டுகளை போலீஸாா் பறிமுதல் செய்தனா்.

முக்கியக் குற்றவாளியை பிடிக்க தீவிரம்:

மதுரையில் கைது செய்யப்பட்ட 5 பேருக்கும் ஒசூா் பகுதியைச் சோ்ந்த ராஜேஷ் என்பவா் கொடுக்கும் தொகைக்கு இரட்டிப்பாக கள்ளநோட்டுகளை வழங்கியது விசாரணையில் தெரியவந்தது. இதையடுத்து ராஜேஷை கைது செய்ய போலீஸாா் ஒசூருக்கு விரைந்துள்ளனா்.