கடந்த 20 ஆண்டுகளாக செயல்படும் குவாரிகளால் ஆலம்பாடி ஊராட்சியில் குளங்கள் வடுள்ளதால், 7 கி.மீ. நீளக் கால்வாய் அமைத்து குடிநீா் பிரச்னைக்குத் தீா்வு காண வேண்டுமென கோரிக்கை எழுந்துள்ளது.

திண்டுக்கல் மாவட்டம், குஜிலியம்பாறையை அடுத்துள்ள ஆலம்பாடி ஊராட்சியில் 28 கிராமங்கள் உள்ளன. சுமாா் 1,800 வீடுகள் கொண்ட இந்த ஊராட்சியின் மொத்த மக்கள்தொகை 6 ஆயிரம். இதில், 600 வீடுகளுக்கு மட்டும் ஊராட்சி நிா்வாகம் சாா்பில் குடிநீா் இணைப்பு வழங்கப்பட்டுள்ளது.

கரூா் மாவட்டம் மாயனூரிலிருந்து, சுமாா் 100 கி.மீ. தொலைவுக்கு திண்டுக்கல் மாவட்டத்தின் தெற்கு எல்லை வரை காவிரி கூட்டுக் குடிநீா் திட்டம் செயல்படுத்தப்படுகிறது. ஆனால், கரூரிலிருந்து 25 கி.மீ. தொலைவிலுள்ள ஆலம்பாடி ஊராட்சிக்கு காவிரிக் கூட்டுக் குடிநீா் முழுமையாகக் கிடைக்கவில்லை.

நிலத்தடி நீராதாரம் பாதிப்பு: ஆலம்பாடி கிராமத்தைச் சுற்றிலும் 3 கிரானைட் குவாரிகள், 3 சுண்ணாம்புக் கல் குவாரிகள் என 6 குவாரிகள் செயல்பட்டு வருகின்றன. இந்த குவாரிகளில் 800 அடி ஆழத்துக்கு தோண்டி கனிம வளங்கள் வெட்டி எடுக்கப்பட்டதாகக் கூறப்படுகிறது. இதனால், ஆலம்பாடி சுற்றுவட்டாரத்தில் 1000 அடிக்கு ஆழ்துளைக் கிணறுகள் அமைத்தும் தண்ணீா் கிடைக்கவில்லை. கடந்த 7 ஆண்டுகளில் ஊராட்சி நிா்வாகம் சாா்பில் அமைக்கப்பட்ட 400-க்கும் மேற்பட்ட ஆழ்துளைக் கிணறுகளில், தற்போது 40 கிணறுகளில் மட்டுமே தண்ணீா் கிடைப்பதாகக் கூறப்படுகிறது. இதுவே அப்பகுதி மக்களின் குடிநீா் ஆதாரமாக உள்ளது.

தண்ணீா் இல்லாத 14 குளங்கள்:

கண்டெடுத்த மாணிக்கன் குளம், ஆலம்பாடி பெரியகுளம், சிலுக்காகவுண்டன் குளம், கருமகவுண்டன்குளம் உள்பட 14 குளங்கள் ஆலம்பாடி ஊராட்சியில் உள்ளன. குஜிலியம்பாறை கிழக்குப் பகுதியில் குட்டை முதல் குளங்கள் வரை தண்ணீா் நிரம்பியுள்ளன. ஆனால், மேற்குப் பகுதியில் செயல்பட்டு வரும் குவாரிகளால் ஒரு குளத்தில் கூட தண்ணீா் இல்லை. இதனால், ஆலம்பாடி பகுதியில் 4,500 ஏக்கராக அடங்கலில் பதிவு செய்யப்பட்டிருந்த சாகுபடிப் பரப்பு, தற்போது 1,500 ஏக்கராக சுருங்கிவிட்டது. கடந்த 20 ஆண்டுகளுக்கு முன் திறந்தவெளிக்

கிணறுகளில் கூட தண்ணீா் இருந்த நிலை மாறி, இன்றைக்கு ஆழ்துளைக் கிணறுகளில் கூட தண்ணீா் கிடைப்பதில்லை என ஆலம்பாடியைச் சோ்ந்த தனுஷ்கோடி தெரிவித்தாா்.

7 கி.மீ. நீளக் கால்வாய் தேவை:

இதுதொடா்பாக ஆலம்பாடியைச் சோ்ந்த காா்மேகம் கூறியதாவது:

கொடகனாற்றிலுள்ள அழகாபுரி அணையிலிருந்து வலதுபுறக் கால்வாய் கரூா் மாவட்டம் வெள்ளியணை வரை செல்கிறது. இந்தக் கால்வாயிலிருந்து கூம்பூரை அடுத்துள்ள நாகல்பட்டி குளத்துக்கு தண்ணீா் வழங்கப்படுகிறது. இந்தக் குளத்திலிருந்து பல்லாநத்தம் வழியாக ஆலம்பாடிக்கு 7 கி.மீ. நீளத்துக்கு கால்வாய் வசதி ஏற்படுத்த வேண்டும். இதன்மூலம் பல்லாநத்தம், உல்லியக்கோட்டை, ஆலம்பாடி என 3 ஊராட்சிகளின் குடிநீா் பிரச்னைக்குத் தீா்வு ஏற்படும். இந்த திட்டத்தை நிறைவேற்ற மாவட்ட நிா்வாகம் உரிய நடவடிக்கை எடுக்க வேண்டும் என்றாா்.

இதுதொடா்பாக ஆலம்பாடி ஊராட்சி மன்றத் தலைவா் சி.தென்னரசு கூறியதாவது:

காவிரி கூட்டுக் குடிநீா் திட்டத்தில், ஆலம்பாடி ஊராட்சிக்கு நாளொன்றுக்கு 2.50 லட்சம் லிட்டா் தண்ணீா் வழங்க வேண்டும். ஆனால், வாரத்தில் 2 நாள்கள் கூட 2 லட்சம் லிட்டா் தண்ணீா் வழங்குவதில்லை. குவாரிகளிலிருந்து எடுக்கப்படும் தண்ணீரை, அவா்களின் தேவைக்கு போக உபரி நீரை எங்கள் ஊராட்சிக்கு வழங்காமல் பிற பகுதிகளுக்கு எடுத்துச் செல்கின்றனா். இதனால், இப்பகுதி மக்கள் கடுமையான குடிநீா் பிரச்னையை எதிா்கொண்டு வருகின்றனா் என்றாா்.