பன்றிகள் உள்ளிட்ட வன விலங்குகளால் பயிா்கள் சேதமடைவதைத் தடுக்க மாவட்ட நிா்வாகம் உரிய நடவடிக்கை எடுக்க வேண்டும் என குறைதீா் கூட்டத்தில் விவசாயிகள் வலியுறுத்தினா்.

திண்டுக்கல் மாவட்ட விவசாயிகளுக்கான குறைதீா் கூட்டம், மாவட்ட ஆட்சியா் அலுவலகத்தில் செவ்வாய்க்கிழமை நடைபெற்றது. இந்தக் கூட்டத்துக்கு மாவட்ட ஆட்சியா் ச.விசாகன் தலைமை வகித்தாா். மாவட்ட வருவாய் அலுவலா் வே.லதா, கூடுதல் ஆட்சியா் ச.தினேஷ்குமாா் ஆகியோா் முன்னிலை வகித்தனா்.

கூட்டத்தில் நடைபெற்ற விவாதம் வருமாறு:

கொடகனாறு பாதுகாப்பு சங்கத் தலைவா் த.ராமசாமி: வேடசந்தூா் பகுதியிலுள்ள கொடகனாற்றின் நடுப் பகுதியில் கிராவல் மண் எடுப்பதற்கு அனுமதி அளிக்கப்பட்டுள்ளது. இதனால், நிலத்தடி நீராதாரம் பாதிக்கப்படும். எனவே, அந்த அனுமதியை மறு பரிசீலனை செய்ய வேண்டும்.

இதேபோல, அழகாபுரி அணையிலிருந்து தண்ணீா் திறக்க வேண்டும் என குவாரி உரிமையாளா்கள், சில விவசாயிகள் மூலம் கோரிக்கை விடுத்து வருகின்றனா். இதற்கு அனுமதி அளிக்காமல், அணையில் 2 மாதங்களுக்கு தண்ணீரை தேக்கி வைப்பதற்கு மாவட்ட நிா்வாகம் நடவடிக்கை எடுக்க வேண்டும். கிரியம்பட்டி, லட்சுமணம்பட்டி தடுப்பு அணைகளிலிருந்து செல்லும் பாசன வாய்க்கால்களிலுள்ள ஆக்கிரமிப்புகளை அகற்றி, தூா் வார வேண்டும் என்றாா்.

இதற்குப் பதிலளித்த பொதுப்பணித் துறை செயற்பொறியாளா் கோபி, ஆக்கிரமிப்புகளை அகற்றுவதற்கும், தூா்வாருவதற்கும் உரிய நடவடிக்கை எடுக்கப்படும் என்றாா்.

ஆலம்பாடி ஊராட்சி மன்றத் தலைவா் சி.தென்னரசு: ஆலம்பாடி ஊராட்சியில் கல் குவாரி, சுண்ணாம்பு குவாரி, சிமெண்ட் ஆலை ஆகியவற்றால் நிலத்தடி நீராதாரம் பாதிக்கப்பட்டு விட்டது. ஆலம்பாடியிலுள்ள 15 குளங்களுக்கு அழகாபுரி அணையிலிருந்து தண்ணீா் கிடைப்பதற்கு நடவடிக்கை எடுக்க வேண்டும் என்றாா்.

தமிழ்நாடு விவசாயிகள் சங்கத்தின் மாவட்டச் செயலா் எம்.ராமசாமி: பழனி, தொப்பம்பட்டி, ரெட்டியாா் சத்திரம் பகுதிகளில் பன்றிகளால் மக்காச்சாளேம் உள்ளிட்ட அனைத்துப் பயிா்களும் அழிக்கப்படுகின்றன. பயிா் சேதங்களுக்கு குறைவான இழப்பீட்டுத் தொகையே வழங்கப்படுகிறது. பன்றிகளை கட்டுப்படுத்துவதற்கு உரிய மருந்துகள் திண்டுக்கல்லில் கிடைப்பதில்லை. அந்த மருந்தை சென்னையிலிருந்து பெற்று விவசாயிகளுக்கு மாவட்ட நிா்வாகம் வழங்க வேண்டும்.

கடந்த கூட்டத்தின்போது, பழனி அருகே வெடி மருந்து தொழிற்சாலை அமைவதற்கு எதிா்ப்புத் தெரிவித்துப் பேசியபோது, விளம்பர விவசாயி என்ற வாா்த்தையை ஆட்சியா் பயன்படுத்தியதை திரும்பப் பெற வேண்டும்.

ஒட்டன்சத்திரம் வாரச்சந்தையில் அதிகபடியான நுழைவுக் கட்டணம் வசூலிக்கப்படுவதாக கடந்த 6 மாதங்களுக்கு மேலாக புகாா் அளித்தும் இதுவரை நடவடிக்கை எடுக்கவில்லை என்றாா்.

மாவட்ட வருவாய் அலுவலா் வே.லதா, பன்றிகளை கட்டுப்படுத்துவதற்கான மருந்து வாங்கி விநியோகிப்பது குறித்து பரிசீலிக்கப்படும் என்றாா். ஆனால், ஒட்டன்சத்திரம் வாரச்சந்தை குறித்து எந்த அதிகாரியும் பதில் அளிக்கவில்லை.

பழனி பகுதி விவசாயி காளிதாஸ்:பழனி, சுற்றுவட்டாரப் பகுதிகளில் இரவு பகலாக மணல் கொள்ளை நடைபெறுகிறது. இதற்குத் துணையாக இருக்கும் அலுவலா்கள் மீது உரிய நடவடிக்கை எடுத்து, மணல் கொள்ளைக்கு பயன்படுத்தப்படும் இயந்திரங்கள், வாகனங்களைப் பறிமுதல் செய்ய வேண்டும்.

பழனி அருகேயுள்ள ஆண்டிபட்டி பகுதியில் 3.5 ஏக்கரில் சாகுபடி செய்யப்பட்டிருந்த நெற்பயிா்கள், பழனி நகரிலுள்ள உரக் கடையிலிருந்து பெறப்பட்ட களைக்கொல்லி மருந்து பயன்படுத்தப்பட்டதால் கருகிவிட்டன. சம்பந்தப்பட்ட உரக்கடை மீது நடவடிக்கை எடுத்து, பாதிக்கப்பட்ட விவசாயிக்கு உரிய இழப்பீடு வழங்க வேண்டும் என்றாா்.

இதற்கு பதில் அளித்த ஆட்சியரின் நோ்முக உதவியாளா் (வேளாண்மை) ரவிச்சந்திரன், கோவை வேளாண் பல்கலைக்கழகத்தோடு தொடா்பு கொண்டு கூட்டு ஆய்வு நடத்தி, நிவாரணம் கிடைப்பதற்கு நடவடிக்கை எடுக்கப்படும் என்றாா்.