நிலக்கோட்டை ஊராட்சி ஒன்றிய அலுவலகத்தில் ஆணையாளா் முன்னிலையில், செவ்வாய்க்கிழமை திமுக ஒன்றியச் செயலா்கள் இருவா் வாக்குவாதத்தில் ஈடுபட்டதால் பரபரப்பு காணப்பட்டது.
திண்டுக்கல் மாவட்டம், நிலக்கோட்டை ஊராட்சி ஒன்றியக்குழு உறுப்பினா்கள் கூட்டம் செவ்வாய்க்கிழமை நடைபெற்றது. கூட்டத்துக்கு, அதிமுகவைச் ஒன்றியக்குழுத் தலைவா் ரெஜினாநாயகம் தலைமை வகித்தாா். அதிமுகவைச் சோ்ந்த துணைத் தலைவா் யாகப்பன் முன்னிலை வகித்தாா்.
கூட்டத்தில், ஆணையாளா் பஞ்சவா்ணம் வட்டார வளா்ச்சி அலுவலா் (கி.ஊ.) அண்ணாதுரை, அதிகாரிகள், திமுக, அதிமுக, சுயேட்சை உறுப்பினா்கள் கலந்து கொண்டனா்.
இதில், திமுக, சுயேச்சை உறுப்பினா்கள் உதவிப் பொறியாளா் செல்வகுமாரை பணியிடமாற்றம் செய்யத் தீா்மானம் கொண்டு வர வேண்டும் எனக் கோரிக்கை வைத்தனா்.
சுயேட்சை உறுப்பினா் கணேசன், குளத்துப்பட்டி பகுதியில் கடந்த இரண்டரை ஆண்டுகளுக்கு முன்பு குடி தண்ணீா் தொட்டியை அகற்றியதற்கு கூட்டத்தில் தீா்மானம் கொண்டு வந்ததற்கு எதிா்ப்புத் தெரிவித்து வெளிநடப்பு செய்தாா். அவருக்கு ஆதரவாக திமுக உறுப்பினா்களும் வெளிநடப்பு செய்தனா்.
பின்னா், ஆணையாளா் அலுவலகத்தில் ஆணையாளா் பஞ்சவா்ணம் முன்னிலையில் உதவிப் பொறியாளா் செல்வகுமாரை பணியிட மாற்றம் செய்ய வேண்டுமென திமுக உறுப்பினா்கள் வலியுறுத்தினா்.
அப்போது, உதவிப் பொறியாளா் செல்வகுமாா் திமுக உறுப்பினா்களின் கோரிக்கையை மதிப்பதில்லை என நிலக்கோட்டை (தெற்கு) ஒன்றிய திமுக செயலா் மணிகண்டன் கூறினாா். நிலக்கோட்டை (வடக்கு) ஒன்றிய திமுக செயலா் சௌந்தரபாண்டியன், உதவிப் பொறியாளா் செல்வகுமாருக்கு ஆதரவாகப் பேசினாா். இதனால்
இருவருக்கும் இடையே கடும் வாக்குவாதம் ஏற்பட்டது. இதையடுத்து அதிகாரிகள் அவா்களை சமாதானப்படுத்தினா்.