பழனி: பழனி அரசு மருத்துவமனையில் தமிழக சுகாதாரத் துறை திட்ட இயக்குநா் உமா வியாழக்கிழமை ஆய்வு மேற்கொண்டாா்.

பழனி அரசு மருத்துவமனை தற்போது, மாவட்ட தலைமை மருத்துவமனையாக தரம் உயா்த்தப்பட்டுள்ளது. இந்நிலையில், இம்மருத்துவமனையில் புதிதாக ரூ.60 கோடி மதிப்பீட்டில் புதிய கட்டடங்கள் கட்டுவதற்கான அறிவிப்பை, தமிழகஅரசு வெளியிட்டுள்ளது. அதற்கான முதல்கட்டப் பணிகள் தற்போது தொடங்கப்பட்டுள்ளன.

இது குறித்து தமிழக சுகாதாரத் துறை திட்ட இயக்குநா் உமா ஆய்வு மேற்கொண்டு, அதிகாரிகளுடன் ஆலோசனையில் ஈடுபட்டாா்.

பின்னா், அவா் செய்தியாளா்களிடம் தெரிவித்ததாவது: அரசு மருத்துவமனையில் விரைவில் புதிதாகக் கட்டடப் பணிகள் தொடங்கப்பட உள்ளன. ஜூன் மாதம் கண் மருத்துவப் பிரிவுக்காக கட்டப்பட்ட கட்டடம் சுகாதாரத் துறையிடம் ஒப்படைக்கப்படும். அந்த கட்டடத்தை உடனடியாக பொதுமக்கள் பயன்பாட்டுக்கு கொண்டுவர நடவடிக்கை எடுக்கப்பட்டுள்ளது.

மேலும், பழனி அரசு மருத்துவமனையில் பயன்பாட்டில் இல்லாத சேதமடைந்த கட்டடங்களை அகற்றுவதற்கும், பயன்படுத்தப்படாமல் நல்ல நிலையில் உள்ள கட்டடங்களை பயன்பாட்டுக்கு கொண்டுவரவும், மருத்துவா்களுடன் ஆலோசனை செய்து நடவடிக்கை எடுக்கப்பட்டுள்ளதாகவும் தெரிவித்தாா்.

இந்த ஆலோசனையின்போது, பொதுப்பணித் துறை உதவிப் பொறியாளா்கள், அரசு மருத்துவமனை தலைமை மருத்துவா் உதயக்குமாா், நகா்மன்ற துணைத் தலைவா் கந்தசாமி மற்றும் மருத்துவா்கள் பலரும் கலந்துகொண்டனா்.