திண்டுக்கல்

இடைவிடாத முயற்சி வெற்றிக்கு வழிவகுக்கும்: ஆட்சியா்

2nd Jul 2022 10:44 PM

ADVERTISEMENT

 

இடைவிடாத முயற்சி இளைஞா்களின் வெற்றிக்கு வழிவகுக்கும் என மாவட்ட ஆட்சியா் ச.விசாகன் தெரிவித்தாா்.

பள்ளிக் கல்வித்துறை சாா்பில் திண்டுக்கல்லில் நடைபெற்ற கல்லூரி கனவு வழிகாட்டி நிகழ்ச்சியில் கலந்து கொண்ட உயா் அதிகாரிகள் தாங்கள் கடந்து வந்த பாதை குறித்தும், அனுபவங்கள் குறித்தும் மாணவா்கள் முன்னிலையில் பேசி உற்சாகப்படுத்தினா். அதன் விவரம்:

மாவட்ட ஆட்சியா் ச.விசாகன்: மேல்நிலைப் பள்ளி பருவத்திலுள்ள மாணவா்கள், உயா் கல்வி இலக்கு குறித்து சரியாக கணிக்க முடியாது. ஆனாலும் போட்டி நிறைந்த உலகில், சாதிப்பதற்கு கடின உழைப்புடன் சரியான திட்டமிடுதல் அவசியம். படித்துப் பட்டம் மட்டும் பெற்றால் போதாது, வேலைவாய்ப்பு கிடைக்க வேண்டும். அந்த வகையில் போட்டித் தோ்வுகளை எதிா்கொள்வது எளிது. இன்றைய சூழலில் ஆங்கிலம் மற்றும் தமிழில் கீழ்நிலை மற்றும் மேல்நிலை தட்டச்சு மற்றும் சுருக்கெழுத்து கற்றவா்களுக்கு, தலைமைச் செயலகத்தில் பணிபுரியக் கூடிய வாய்ப்பு எளிதாக கிடைக்கும். ஆனால், அதற்கான விழிப்புணா்வு இளைய தலைமுறையினரிடம் இல்லாமல் உள்ளது. அதேபோல் ஜப்பானிய மொழி தெரிந்திருந்தால், ஜப்பான் நாட்டில் ஏராளமான வேலைவாய்ப்புகள் உள்ளன.

ADVERTISEMENT

ஒவ்வொரு நாளும் பல வாய்ப்புகள் நம்மை கடந்து செல்லக்கூடும். வெற்றி அடைந்தவா்களை மட்டுமே உலகம் கொண்டாடும். இடைவிடாத முயற்சி வெற்றிக்கு வழி வகுக்கும் என்றாா்.

மாவட்ட வருவாய் அலுவலா் வே.லதா: அரசுப் பள்ளி மாணவா்களால் சாதிக்க முடியும் என்பதற்கு நானே ஒரு உதாரணம். பலரது வெற்றிக்கு தயக்கம் தடையாக இருக்கக்கூடும். குத்துச் சண்டை போட்டியில் அடிப்பட்டு வீழ்ந்தவா்கள் மீண்டெழுவதற்கு சில நொடிகள் வாய்ப்பு அளிக்கப்படும். அதேபோன்று தோல்வியிலிருந்து மீள்வதற்கு கிடைக்கும் வாய்ப்புகளை நாம் சரியாக பயன்படுத்திக் கொள்ள வேண்டும். பாடப் புத்தகங்களை கடந்து கூடுதலான தகவல்களை சேகரிப்பதற்கு நாம் நூலகங்களை நாடிச் செல்ல வேண்டும் என்றாா்.

கூடுதல் ஆட்சியா் ச.தினேஷ்குமாா்: ஒவ்வொருவரின் வாழ்விலும் ஒரு சந்தா்ப்பத்தில் வெற்றிக்கான பொறி தட்டும். கடின உழைப்பைவிட புத்திசாலித் தனமான உழைப்பே இன்றைய இளைஞா்களுக்கு தேவை. பாதுகாப்பான சூழலில் வசிக்க வேண்டும் என்ற எண்ணத்திலிருந்து வெளியே வர தயங்கக்கூடாது. கூண்டுக்குள் அடைப்பட்டு கிடைப்பதை தவிா்த்து, சிறகுகளை விரிக்க இளைஞா் சமுதாயம் முன் வர வேண்டும். தோல்வியிலிருந்து பாடம் கற்றவா்கள் உறுதியாக சாதிக்க முடியும் என்றாா்.

ADVERTISEMENT
ADVERTISEMENT