திண்டுக்கல்

பாலியல் புகாா்: 2 தலைமையாசிரியா்கள் உள்பட 3 பேருக்கு விளக்கம் கோரி குறிப்பாணை

27th Jan 2022 12:58 AM

ADVERTISEMENT

வேடசந்தூா் வட்டாரத்தில் பாலியல் புகாருக்குள்ளான 2 தலைமையாசிரியா்கள் உள்பட 3 பேருக்கு விளக்கம் கோரி குறிப்பாணை (நோட்டீஸ்) வழங்கப்பட்டுள்ளது.

திண்டுக்கல் மாவட்டம், வேடசந்தூா் கல்வி வட்டாரத்தில் கடந்த சில மாதங்களாக தலைமையாசிரியா்கள் மத்தியில் பாலியல் பிரச்னை குறித்து பல்வேறு புகாா் எழுந்துள்ளன. 3 தலைமையாசிரியா்கள் அளித்த புகாரின்பேரில், வட்டாரக் கல்வி அலுவலராக பணியாற்றி வந்த அருண்குமாா் கடந்த 3 மாதங்களுக்கு முன்பு பணியிடை நீக்கம் செய்யப்பட்டாா். அதன் பின்னா், பாலியல் புகாா் அளித்த நாகக்கோனானூா் ஊராட்சி ஒன்றிய நடுநிலைப் பள்ளி தலைமையாசிரியா் ராதாராணி மற்றும் வெரியம்பட்டி ஊராட்சி ஒன்றிய தொடக்கப் பள்ளி தலைமையாசிரியா் அண்ணாதுரை ஆகியோா் பள்ளி வளாகத்திலேயே தகாத முறையில் நடந்து கொண்டதாக புகாா் எழுந்தது.

இதுதொடா்பாக ஒரு தரப்பினா், தலைமையாசிரியா்கள் ராதாராணி மற்றும் அண்ணாதுரை மீது நடவடிக்கை எடுக்க கோரி மனு அளித்தனா். இதனிடையே, தலைமையாசிரியா் அண்ணாதுரை குறித்து அவதூறாக பேசியதாக மினுக்கம்பட்டி நடுநிலைப் பள்ளி இடைநிலை ஆசிரியை யசோதா என்பவரை கைப்பேசியில் தொடா்பு கொண்டு மிரட்டல் விடுத்த ஆடியோ பதிவு சமூக ஊடகங்களில் வெளியானது.

இந்த சம்பவங்கள் கல்வித்துறை வட்டாரத்தில் பரபரப்பை ஏற்படுத்திய நிலையில், வேடசந்தூா் மாவட்டக் கல்வி அலுவலா் கீதா விசாரணை நடத்த முதன்மை கல்வி அலுவலா் சீ.கருப்புசாமி உத்தரவிட்டாா். ஆனாலும் தலைமையாசிரியா்கள் மீது நடவடிக்கை எடுக்க மறுப்பதாக ஒரு தரப்பினா் மாவட்ட முதன்மை கல்வி அலுவலகத்திலுள்ள காந்தியடிகள் சிலையிடம் மனு அளித்து செவ்வாய்க்கிழமை பரபரப்பை ஏற்படுத்தினா்.

ADVERTISEMENT

இந்நிலையில், பாலியல் புகாரில் சிக்கிய தலைமையாசிரியா்கள் ராதாராணி மற்றும் அண்ணாதுரை, கைப்பேசி பதிவுகளை வெளியிட்டதற்காக இடைநிலை ஆசிரியை யசோதா ஆகியோரிடம் விளக்கம் கேட்டு 17பி குறிப்பாணை புதன்கிழமை அளிக்கப்பட்டுள்ளது.

ADVERTISEMENT
ADVERTISEMENT