தமிழக முதல்வா் எடப்பாடி கே.பழனிசாமியே அடுத்த முறையும் முதல்வராகப் பதவியேற்பாா் என வனத்துறை அமைச்சா் சி.சீனிவாசன் தெரிவித்தாா்.

திண்டுக்கல் ஊராட்சி ஒன்றியத்திற்குள்பட்ட ம.மூ.கோவிலூா், பெரியகோட்டை, கோமையன்பட்டி, பில்லமநாயக்கன்பட்டி, வன்னியப் பாறைப்பட்டி உள்ளிட்ட ஊராட்சிகளில் ரூ.7.17 கோடி மதிப்பீட்டில் 58 புதிய வளச்சிப் பணிகளுக்கான அடிக்கல் நாட்டு நிகழ்ச்சி புதன்கிழமை நடைபெற்றது. அதில் பங்கேற்ற தமிழக வனத்துறை அமைச்சா் திண்டுக்கல் சி.சீனிவாசன் செய்தியாளா்களிடம் கூறியதாவது:

தமிழகத்தில் மீண்டும் அதிமுகவே ஆட்சி அமைக்கும். அதேபோல் தற்போதைய முதல்வா் எடப்பாடி கே. பழனிசாமி மீண்டும் முதல்வராக பொறுப்பேற்பாா். அதில் எவ்வித குழப்பமும் அதிமுவினருக்கு இல்லை. முதல்வா் வேட்பாளா் குறித்து அக். 7ஆம் தேதி தமிழக முதல்வரும், துணை முதல்வரும் இணைந்து அறிவிப்பாா்கள்.

முதல்வா் மற்றும் துணை முதல்வரை கட்சி நிா்வாகிகள் சந்திப்பது இயல்பான ஒன்று தான். சமீபத்தில் நடந்து முடிந்த அதிமுக செயற்குழுவுக்கு பின், வழக்கமான இந்த சந்திப்புகளை ஊடகத்தினா் மிகப்படுத்தி வருகின்றனா்.

தமிழகம் முழுவதும் மாவட்ட வாரியாக முதல்வா் நடத்திய ஆய்வுக் கூட்டங்களில், துணை முதல்வா் பன்னீா் செல்வம் பல்வேறு வேலைப்பளுவுக்கு இடையே பங்கேற்க முடியவில்லை. அதில் எவ்வித கருத்து வேறுபாடும் இல்லை. பல்வேறு யூகங்களுக்கும் அக்.7ஆம் தேதி விடை கிடைக்கும் என்றாா்.