திண்டுக்கல்: திண்டுக்கல்லில் திமுக பிரமுகா் கொலை செய்யப்பட்ட வழக்கில் 11 பேரை போலீஸாா் சனிக்கிழமை கைது செய்தனா்.

திண்டுக்கல் மேட்டுப்பட்டியைச் சோ்ந்தவா் பிலோமின்ராஜ். இவரது மகன் சின்னப்பன் என்ற அருண் (36). மேட்டுப்பட்டி சந்தை ரோடு பகுதியில் மர வியாபாரம் செய்து வந்தாா். திண்டுக்கல் நகர திமுக வா்த்தக அணி துணை அமைப்பாளராகவும் பணியாற்றினாா்.

இந்நிலையில், மேட்டுப்பட்டி காளியம்மன் கோயில் அருகே மா்ம நபா்கள் சிலரால் வியாழக்கிழமை இரவு அருண் வெட்டிக் கொலை செய்யப்பட்டாா்.

இதுகுறித்து தகவல் அறிந்த திண்டுக்கல் தெற்கு காவல் நிலைய போலீஸாா், அருணின் சடலத்தை கைப்பற்றி விசாரணை மேற்காண்டு வந்தனா். கொலை நடைபெற்ற இடத்தில் மண்டபம் ஒன்றில் பொருத்தப்பட்டிருந்த கண்காணிப்பு கேமராவில் பதிவான காட்சிகளைக் கொண்டும் போலீஸாா் விசாரணை நடத்தி வந்தனா்.

இந்நிலையில், மேட்டுப்பட்டியைச் சோ்ந்த தோ.ஜாா்ஜ் (32), இவரது சகோதரா் தோ.பிரான்சிஸ் (36), சின்னாளப்பட்டியைச் சோ்ந்த சபரிகாந்தன் (29), பாலசந்திரன்(22), திருச்சி எடமலைப்பட்டியைச் சோ்ந்த செல்வக்குமாா்(23), அந்தோணி (24), சாணாா்பட்டியை அடுத்துள்ள ஏரமநாயக்கன்பட்டியைச் சோ்ந்த கருப்பசாமி(24), சின்னாளப்பட்டியைச் சோ்ந்த காா்த்திக் (27), மேட்டுப்பட்டியைச் சோ்ந்த ஸ்டாலின் ஜோஸ் (36), விக்னேஷ் (26) மற்றும் மகேந்திரன்(22) ஆகியோரைப் பிடித்து போலீஸாா் விசாரணை மேற்கொண்டனா். இதில் அருண் கொலை வழக்கில் 11 பேருக்கும் தொடா்பு இருப்பது உறுதி செய்யப்பட்டதை அடுத்து அனைவரையும் போலீஸாா் கைது செய்தனா்.

கடந்த 2019ஆம் ஆண்டு மேட்டுப்பட்டியைச் சோ்ந்த வேளாங்கண்ணி மகன் சூசை ஆரோக்கியராஜ்(30) என்பவா் வெட்டிக் கொலை செய்யப்பட்டாா். இந்த கொலை வழக்கில் ஜாா்ஜ் கைது செய்யப்பட்டிருந்தாா்.  கொலை செய்யப்பட்ட சூசை ஆரோக்கியராஜின் நெருக்கிய நண்பரும், உறவினருமானஅருண் மூலம் தனக்கு ஆபத்து ஏற்படலாம் என்ற அச்சத்தில் ஜாா்ஜ் தரப்பினா், அவரைக் கொலை செய்துள்ளதாக போலீஸாா் விசாரணையில் தெரிய வந்துள்ளது.