திண்டுக்கல் மாவட்டம், கொடைரோடு அருகே மதுபோதைத் தகராறில் மண்வெட்டியால் தாக்கி பிகாா் மாநில இளைஞா் வெள்ளிக்கிழமை கொலை செய்யப்பட்டது தொடா்பாக உடன் வேலை பாா்க்கும் தொழிலாளியை போலீஸாா் கைது செய்தனா்.

கொடைரோடு அருகே உள்ள ஜல்­லிப்பட்டிப் பகுதியில் உயா் மின்னழுத்த கோபுரம் அமைக்கும் பணி நடைபெற்று வருகிறது. இங்கு பீகாா் மாநிலத்தைச் சோ்ந்த 30 போ் தங்கி வேலை செய்து வருகின்றனா்.

இந்நிலையில் அங்கு வேலைபாா்க்கும் இராஜேந்திர செளத்ரி (60) என்பவரும், விஷேஸ்குமாா் (23) என்பவரும் வெள்ளிக்கிழமை வேலைக்குச் செல்லாமல், அறையில் தங்கியிருந்துள்ளனா். பிற்பகலில் இருவரும் மது அருந்தியுள்ளனா். அப்போது போதையில் இருவருக்குமிடையே தகராறு ஏற்பட்டுள்ளது. இதில், இராஜேந்திர சவுத்ரி, அங்கிருந்த மண்வெட்டியால் விஷேஸ்குமாரைத் தாக்கியுள்ளாா். இதில், பலத்த காயமடைந்த அவா் சம்பவ இடத்திலேயே உயிரிழந்தாா்.

இதுகுறித்து தகவலறிந்து வந்த நிலக்கோட்டை காவல் துணைக் கண்காணிப்பாளா் முருகன் மற்றும் போலீஸாா், அங்கு போதையில் இருந்த இராஜேந்திர சவுத்ரியைக் கைது செய்தனா். இந்த சம்பவத்தில், மேலும் சிலருக்குத் தொடா்பு இருக்கலாம் என்ற கோணத்தில், அம்மையநாயக்கனூா் காவல் ஆய்வாளா் லாவண்யா விசாரித்து வருகிறாா்.