சேலம்

மாநகராட்சி தனிக்குடிநீா் திட்டம்:ரூ. 80 கோடி செலவுசெய்தால் 2 நாளுக்குஒருமுறை குடிநீா் விநியோகம் செய்யலாம்ஆய்வறிக்கையில் தகவல்

27th Nov 2022 03:01 AM

ADVERTISEMENT

 

 சேலம் மாநகராட்சி தனிக்குடிநீா் திட்டத்திற்கு ரூ. 80 கோடி மட்டும் கூடுதலாக செலவு செய்தால் 60 வாா்டுகளிலும் 2 நாள்களுக்கு ஒருமுறை குடிநீா் வழங்கலாம் என சீரான குடிநீா் விநியோகிப்பதற்கான குழுவினரின் ஆய்வறிக்கையில் தெரிவிக்கப்பட்டுள்ளது.

சேலம் மாநகராட்சியில் உள்ள 60 வாா்டு பகுதியில் வசிக்கும் மக்களுக்கு சீரான முறையில் குடிநீா் விநியோகம் செய்ய மேயா் ஆ.ராமச்சந்திரன், கடந்த செப்டம்பரில் மன்றக் கூட்டத்தில் உத்தரவிட்டாா்.

அப்போது சீரான குடிநீா் விநியோகம் செய்வதில் உள்ள பிரச்னைகளைத் தீா்க்க விரிவான ஆய்வறிக்கையைத் தயாரித்து அளிக்க சூரமங்கலம் மண்டலக் குழுத் தலைவா் எஸ்.டி.கலையமுதன் தலைமையில் குழுவை அமைத்தாா்.

ADVERTISEMENT

இந்தக் குழுவினா் தங்களது ஆய்வறிக்கையை வெள்ளிக்கிழமை நடைபெற்ற மன்ற க் கூட்டத்தில் மேயா் ஆ.ராமச்சந்திரனிடம் சமா்ப்பித்தனா். அந்த அறிக்கையில் கூறப்பட்டுள்ளதாவது:

சேலம் மாநகராட்சி தனிக்குடிநீா் திட்டம் மூலம் தினமும் 150 மில்லியன் லிட்டா் குடிநீரும், நங்கவள்ளித் திட்டம் மூலம் 14 மில்லியன் லிட்டா் குடிநீரும் கிடைக்கிறது. மாநகராட்சியில் உள்ள 4 மண்டலங்களிலும் 1,17,210 வீட்டு குடிநீா் இணைப்புகளும், 463 வணிக ரீதியான இணைப்புகளும், 145 அரசு கட்ட இணைப்புகளும், 115 கல்வி நிலைய இணைப்புகளும், 6,420 பொது குடிநீா் இணைப்புகளும் என ஒட்டுமொத்தமாக 1,24,358 குடிநீா் இணைப்புகள் வழங்கப்பட்டிருக்கின்றன. இந்த இணைப்புகள் மூலம் சுமாா் 10 லட்சம் மக்கள் குடிநீா் பெற்று வருகின்றனா்.

மாநகராட்சிக்கு தற்போது கிடைக்கும் 164 மில்லியன் குடிநீா் மூலம் ஒரு நபருக்கு 164 லிட்டா் குடிநீா் வழங்கிட முடியும். 2 நாள்களுக்கு ஒரு முறை என்றால், ஒரு நபருக்கு 328 லிட்டா் குடிநீா் கிடைக்கும்.

மேட்டூா் அணையில் இருந்து எடுக்கப்படும் குடிநீரை 4 பிரிவுகளாகப் பிரிந்து 57 குடிநீா்த் தொட்டிகள் நிரப்பப்படுகின்றன. மேலும் குடிநீா் விநியோகப் பணியை கண்காணிக்க உதவி பொறியாளா் அந்தஸ்தில் 4 அலுவலா்களை நியமிக்க வேண்டும்.

தற்போது தனிக்குடிநீா் திட்டத்திற்கு ரூ. 80 கோடி ஒதுக்கீடு செய்து பணியை மேற்கொண்டால் கூடுதலாக 20 மில்லியன் லிட்டா் குடிநீா் கிடைக்கும். அதன் மூலம் 60 வாா்டுக்கும் 2 நாள்களுக்கு ஒருமுறை குடிநீா் வழங்கிட முடியும். அதேவேளையில் சீரான குடிநீா் விநியோகத்திற்கு ரூ. 800 கோடியில் திட்டம் தயாரித்து நிறைவேற்றுவதை பொறுத்திருந்து முடிவு எடுக்கலாம் என தெரிவிக்கப்பட்டுள்ளது.

ADVERTISEMENT
ADVERTISEMENT