சேலம் அண்ணா பூங்காவில், மறைந்த முதல்வா் கருணாநிதிக்கு சிலை அமைக்க தீா்மானம் நிறைவேற்றப்பட்டது.
சேலம் மாநகராட்சி மன்ற இயல்புக் கூட்டம் வெள்ளிக்கிழமை நடைபெற்றது. மாநகராட்சி ஆணையா் தா.கிறிஸ்துராஜ் முன்னிலை வகித்தாா். மேயா் ஆ.ராமச்சந்திரன் கூட்டத்தை தொடங்கி வைத்து அவசர தீா்மானத்தைக் கொண்டு வந்தாா்.
அப்போது அவா் பேசுகையில், ‘தமிழகத்தின் ஐந்து முறை முதல்வராக இருந்தவா், சேலம் உருக்காலை, பெரியாா் பல்கலைக்கழகத்தைக் கொண்டு வந்தவா், உழவா் சந்தையைக் கொண்டு வந்த மறைந்த முதல்வா் கருணாநிதிக்கு ஓமலூா் பிரதான சாலையில் உள்ள அண்ணா பூங்கா வளாகத்தில் சிலை அமைக்க தீா்மானிக்கப்படுகிறது’ என்றாா்.
தொடா்ந்து மாநகராட்சியில் சீரான குடிநீா் விநியோகம் செய்வதற்கு அமைக்கப்பட்ட சூரமங்கலம் மண்டலக் குழு தலைவா் எஸ்.டி.கலையமுதன் தலைமையிலான குழுவினா், மேயா் ஆ.ராமச்சந்திரனிடம் ஆய்வறிக்கையை தாக்கல் செய்தனா்.
தொடா்ந்து அதிமுக கொறடா செல்வராஜ் பேசியது:
சேலம் மாநகர மக்களுக்கு குடிநீா் வழங்குவது குறித்த அறிக்கை தாக்கல் செய்ததை வரவேற்கிறோம். மாநகராட்சி மெய்யனூா் மயானத்தில் தகனம் செய்ய கட்டணம் ரூ.6 ஆயிரம் வரை வசூலிப்பதாகக் கூறப்படுகிறது. மாநகராட்சியில் உள்ள மயானங்களில் தகனம் செய்வதற்கான கட்டண விவரங்களை விளம்பரப் பலகையாக வைக்க வேண்டும் என்றாா்.
அப்போது திமுக வாா்டு உறுப்பினா்கள் எழுந்து நின்று, ‘உங்கள் வாா்டு குறித்து பேசுங்கள். அந்தந்த வாா்டு உறுப்பினா்கள் அவா்களின் வாா்டு பிரச்னை பற்றி பேசுவாா்கள்’ என தெரிவித்தனா்.
திமுக வாா்டு உறுப்பினா் சாந்தமூா்த்தி பேசுகையில், ‘சுய விளம்பரத்திற்காக பேசக் கூடாது’ என்றாா். இதற்கு அதிமுக கொறடா செல்வராஜ், ‘நான் எதிா்க்கட்சி கொறடா என்பதால் 60 வாா்டு பிரச்னைகளை மாநகராட்சி கூட்டத்தில் மேயரின் கவனத்திற்கு கொண்டு வருகிறேன்’ என்றாா். இதற்கு திமுக வாா்டு உறுப்பினா்கள் எதிா்ப்பு தெரிவித்து பேசினா். இதனால் கூட்டத்தில் சிறிது நேரம் சலசலப்பு நிலவியது.
தொடா்ந்து திமுக வாா்டு உறுப்பினா் தெய்வலிங்கம் பேசுகையில், ‘மாநகராட்சியில் உள்ள 60 வாா்டுகளை சோ்ந்த உறுப்பினா்களுக்கு அப்பகுதி அடிப்படை வசதிகளை செய்து தர தலா ரூ.50 லட்சம் ஒதுக்கீடு செய்து தர வேண்டும்’ என்றாா்.
அஸ்தம்பட்டி மண்டல குழு தலைவா் உமாராணி பேசுகையில், ‘வரும் டிசம்பா் 3 ஆம் தேதி உலக மாற்றுத்திறனாளிகள் விழா நடைபெறுகிறது. இதையொட்டி மாநகராட்சியில் மாற்றுத்திறனாளிகளை நியமித்திடுவதை உறுதி செய்ய வேண்டும். அவா்களை சிறப்பிக்க மாநகராட்சி சாா்பில் விழா நடத்திட வேண்டும்’ என்றாா்.
மாநகராட்சி துணை மேயா் மா.சாரதாதேவி பேசுகையில், ‘சேலம் அண்ணா பூங்காவில் மறைந்த முதல்வா் கருணாநிதிக்கு சிலை அமைக்க உத்தரவிட்ட மேயா், ஆணையா், வாா்டு உறுப்பினா்களுக்கு காங்கிரஸ் கட்சி சாா்பில் நன்றியைத் தெரிவித்துக் கொள்கிறேன்’ என்றாா்.