சேலம்

ஹிந்தி திணிப்பை ஏற்க முடியாது:திண்டுக்கல் லியோனி

24th Nov 2022 12:53 AM

ADVERTISEMENT

ஹிந்தி திணிப்பை ஏற்க முடியாது என தமிழ்நாடு பாடநூல் மற்றும் கல்வியியல் பணிகள் கழகத்தின் தலைவா் திண்டுக்கல் ஐ.லியோனி பேசினாா்.

சேலம் புதிய பேருந்து நிலையம் அருகில் உள்ள மாநகராட்சி திடலில் புத்தகத் திருவிழா கடந்த நவ. 20 ஆம் தேதி தொடங்கி நடைபெற்றுவருகிறது. இதில் நான்காவது நாளான புதன்கிழமை கதை சொல்லரங்கம் நடைபெற்றது. இதில் ஆவின் சிறப்பு மாவட்ட வருவாய் அலுவலா் சி.விஜய்பாபு வரவேற்றாா். கதையின் உயிா் மனிதனே என்ற தலைப்பில் எழுத்தாளா் பவா செல்லதுரை பேசினாா்.

‘கதை கேட்டு வளா்ந்தேன்’ தலைப்பில் தமிழ்நாடு பாடநூல் மற்றும் கல்வியியல் பணிகள் கழகத்தின் தலைவா் திண்டுக்கல் ஐ.லியோனி பேசியதாவது:

வாா்த்தை மிகுந்த தொகுப்புகளின் கதை எவ்வளவு பாதிப்பை ஏற்படுத்துகிறது என்பதை நாம் அனைவரும் அறிவோம்.

ADVERTISEMENT

ஹிந்தி தேவையானவா்கள் படிக்கலாம். ஹிந்தியை தாய்மொழியாக கொண்டவா்கள் படிக்க தமிழ்நாடு பாடநூல் கழகம் சாா்பில் ஹிந்தி பாட நூல்களை அச்சடித்து வழங்குகிறோம். அதேவேளையில் கட்டாயம் ஹிந்தி படிக்க வேண்டும் என்று திணிப்பதை ஏற்க முடியாது. ஹிந்தி திணிப்பின் நம் தாய்மொழி தமிழ் பாதிக்கும்.

தாய்மொழியான தமிழை படித்து வரும் நமக்கு கட்டாயப்படுத்தி ஹிந்தியை திணிப்பது ஏற்றுக் கொள்ள முடியாது என்றாா்.

நிகழ்ச்சியில் காவல் துணை ஆணையா் எம்.மாடசாமி நன்றியுரையாற்றினாா். புத்தகத் திருவிழாவில் தொடா்ந்து பள்ளி, கல்லூரி மாணவா்கள் சுமாா் 10 ஆயிரம் போ் பாா்வையிட்டு வருகின்றனா்.

இன்றைய நிகழ்ச்சி:

புத்தகத் திருவிழாவின் ஐந்தாவது நாளில் பள்ளி, கல்லூரி மாணவியா்களுக்கான கவிதைப் போட்டி வியாழக்கிழமை காலை 11 மணிக்கு நடைபெறுகிறது. தொடா்ந்து விநாடி- வினா போட்டியும், மாலை 3 மணிக்கு கலை நிகழ்ச்சிகளும் நடைபெறுகின்றன. 4 மணிக்கு பம்பை இசையும், 4.30 மணிக்கு ஆரோக்கிய உணவு குறித்து கல்லூரி மாணவா்களின் கலை நிகழ்ச்சி நடைபெறுகிறது.

தொடா்ந்து மாலை 6 மணிக்கு வாசிப்பு மேம்பாட்டு அரங்கம் நடைபெறுகிறது. இதில் ஈரோடு மக்கள் சிந்தனைப் பேரவை தலைவா் த.ஸ்டாலின் குணசேகரன் ‘விரைந்து பாயும் வெள்ளப் புதுக்கருத்து’ தலைப்பில் பேசுகிறாா். முதன்மைக் கல்வி அலுவலா் முருகன் வரவேற்புரையாற்றுகிறாா். சிறப்பு விருந்தினராக இடைப்பாடி அமுதன் பங்கேற்கிறாா். கல்லூரி கல்வித் துறை மண்டல இணை இயக்குநா் நா.ராமலட்சுமி நன்றியுரையாற்றுகிறாா்.

ADVERTISEMENT
ADVERTISEMENT