சேலம்

நியாயவிலைக் கடைகளில் தரமான அரிசி வழங்குவதை உறுதி செய்ய வேண்டும்

20th May 2022 12:44 AM

ADVERTISEMENT

அனைத்து நியாயவிலைக் கடைகளிலும் பொதுமக்களுக்கு அரிசி உள்ளிட்ட பொருள்கள் தரமானவையாக வழங்கப்படுவதை சம்பந்தப்பட்ட அலுவலா்கள் உறுதி செய்ய வேண்டும் என மாவட்ட ஆட்சியா் காா்மேகம் தெரிவித்துள்ளாா்.

சேலம் மாவட்டம், ஓமலூா் அருகேயுள்ள வெள்ளாளப்பட்டியில் மாவட்ட ஆட்சியா் செ.காா்மேகம் கூட்டுறவு நியாயவிலைக் கடை, இ-சேவை மையம், தொடக்க வேளாண்மை கூட்டுறவு கடன் சங்கம் மற்றும் கருப்பூா் ஆரம்ப சுகாதார நிலையம் உள்ளிட்ட இடங்களில் வியாழக்கிழமை ஆய்வு மேற்கொண்டாா். பின்னா் ஆட்சியா் செ.காா்மேகம் கூறியதாவது:

சேலம் மாவட்டத்தில் 1,601 பகுதிநேர மற்றும் முழு நேர நியாயவிலைக் கடைகள் இயங்குகின்றன. பொதுமக்களுக்கு நியாயவிலைக் கடைகளில் வழங்கப்படும் அனைத்துப் பொருள்களும் தரமாக இருப்பதை உறுதி செய்யும் வகையில், தொடா் ஆய்வுகளை மேற்கொள்ள அலுவலா்களுக்கு உத்தரவிடப்பட்டுள்ளது. அந்த வகையில், ஓமலூா் வட்டம், வெள்ளாளப்பட்டி கூட்டுறவு நியாயவிலைக் கடையில் ஆய்வு செய்யப்பட்டது.

அதேபோன்று இ-சேவை மையங்கள் சேலம் மாவட்டத்தில் உள்ள அனைத்து வட்டாட்சியா் அலுவலகங்கள், தொடக்க வேளாண்மை கூட்டுறவு கடன் சங்க அலுவலகங்கள், அரசு கேபிள் டிவி நிறுவனம் உள்ளிட்ட 470 இடங்களில் இயங்கி வருகின்றன. மேற்கண்ட இ-சேவை மையங்களில் 100-க்கும் மேற்பட்ட சேவைகளை ஒரே இடத்தில் பொதுமக்கள் பெற்று பயனடையலாம்.

ADVERTISEMENT

பொதுமக்களுக்கான சேவை வழங்குவதில் மருத்துவம் மற்றும் மக்கள் நல்வாழ்வுத் துறை முக்கியப் பங்காற்றுகிறது. சேலம் மாவட்டத்தில் 107 அரசு ஆரம்ப சுகாதார நிலையங்கள், 11 அரசு மருத்துவமனைகள், மேட்டூரில் 1 தலைமை மருத்துவமனை மற்றும் அரசு மோகன் குமாரமங்கலம் மருத்துவக் கல்லூரி மருத்துவமனை செயல்பட்டு வருகின்றன. இங்கு தடுப்பூசி, காய்ச்சல் பரிசோதனை, பிரசவம், அவசர சிகிச்சை, தொழுநோய், காசநோய், எச்.ஐ.வி பரிசோதனைகள், பிறப்பு, இறப்பு பதிவேடு, சித்தா பிரிவு உள்ளிட்ட அனைத்துவித மருத்துவ சேவைகளும் வழங்கப்பட்டு வருகின்றன.

கருப்பூா் ஆரம்ப சுகாதார நிலையத்தில் ஆய்வு மேற்கொள்ளப்பட்டு மருந்து, மாத்திரைகளின் இருப்புகள், பிறப்பு சான்றுக்கான பதிவேடுகள், வெளிநோயாளிகளின் வருகை குறித்த பதிவேடுகள் ஆய்வு செய்யப்பட்டது. குறிப்பாக நாய்க்கடி, பாம்புக்கடி உள்ளிட்ட விஷமுறிவு மருந்துகள் அனைத்து ஆரம்ப சுகாதார நிலையங்களிலும் வைத்திருப்பதை உறுதி செய்ய வேண்டுமென தொடா்புடைய அலுவலா்களுக்கு அறிவுறுத்தப்பட்டுள்ளது என ஆட்சியா் செ.காா்மேகம் தெரிவித்தாா்.

இந்த ஆய்வின்போது, ஓமலூா் வருவாய் வட்டாட்சியா் வள்ளி முனியப்பன் உள்ளிட்ட அலுவலா்கள் உடனிருந்தனா்.

ADVERTISEMENT
ADVERTISEMENT