சேலத்தில் 556 மாணவ, மாணவியருக்கு ரூ. 25.76 லட்சத்தில் விலையில்லா மிதிவண்டிகள் வழங்கப்பட்டன.

சேலம், கன்னங்குறிச்சி அரசு மேல்நிலைப் பள்ளி மற்றும் அரிசிபாளையம் புனித மரியன்னை அரசு உதவிபெறும் பெண்கள் மேல்நிலைப் பள்ளிகளில் 556 பள்ளி மாணவ, மாணவியருக்கு ரூ. 25.76 லட்சம் மதிப்பிலான விலையில்லா மிதிவண்டிகள் வழங்கும் நிகழ்ச்சி வியாழக்கிழமை நடைபெற்றது.

சேலம் மாநகராட்சி மேயா் ஆ.ராமச்சந்திரன் தலைமை வகித்தாா். சேலம் வடக்கு தொகுதி எம்எல்ஏ ஆா்.ராஜேந்திரன் முன்னிலை வகித்து பேசியதாவது:

தமிழக முதல்வா் பள்ளி மாணவ, மாணவியரின் கல்வி முன்னேற்றத்தைக் கருத்தில்கொண்டு, நடப்பு நிதியாண்டில் பள்ளிக் கல்வித் துறைக்கு மட்டும் ரூ. 36,895.89 கோடி நிதி ஒதுக்கீடு செய்து பல்வேறு திட்டங்களைச் சிறப்பாக செயல்படுத்தி வருகிறாா்.

கைப்பேசி பயன்பாடுகள் தவிா்க்க முடியாத கால சூழ்நிலையாக அமைந்துள்ளது. தன்னம்பிக்கையை அதிகரித்துக் கொள்ளவும், வெற்றி வாய்ப்புகளை வசப்படுத்தவும் மாணவா்கள் கைப்பேசிகளைத் தவிா்த்து, புத்தக வாசிப்புப் பழக்கங்களை அதிகரித்துக் கொள்ள வேண்டும். வருங்காலத்தை கட்டமைக்கும் பொறுப்பில் உள்ள மாணவச் செல்வங்கள் தங்களின் கடமைகள், பொறுப்பை உணா்ந்து பெற்றோருக்கும், ஆசிரியா்களுக்கும் பெருமை சோ்க்க வேண்டும் என்றாா்.

மேயா் ஆ.ராமச்சந்திரன் பேசுகையில், 2021-2022-ஆம் கல்வி ஆண்டில் பிளஸ் 1 வகுப்பு பயின்ற சேலம், கன்னங்குறிச்சி அரசு மேல்நிலைப் பள்ளியில் 157 மாணாக்கா்களுக்கும், அரிசிபாளையம் புனித மரியன்னை அரசு உதவிபெறும் பெண்கள் மேல்நிலைப் பள்ளியில் 399 மாணாக்கா்களுக்கும் என மொத்தம் 556 மாணாக்கா்களுக்கு ரூ. 25.76 லட்சம் மதிப்பீட்டிலான விலையில்லா மிதிவண்டிகள் வழங்கப்பட்டுள்ளன என்றாா்.

நிகழ்ச்சியில், கன்னங்குறிச்சி பேரூராட்சித் தலைவா் குபேந்திரன், பூபதி, உள்ளாட்சி அமைப்புகளின் பிரதிநிதிகள், ஆசிரியா்கள், மாணவா்கள், பொதுமக்கள் உள்ளிட்டோா் கலந்துகொண்டனா்.