வாழப்பாடி, சங்ககிரியில் ஜமாபந்தி முகாம் புதன்கிழமை தொடங்கியது.
வாழப்பாடி வருவாய் வட்டத்துக்கு உள்பட்ட பேளூா், அறுநூற்றுமலை, காரிப்பட்டி, வாழப்பாடி ஆகிய 4 குறுவட்ட வருவாய்க் கிராமங்களின் நிலவரி கணக்கு மற்றும் நில உடமை ஆவணங்களைத் தணிக்கை செய்யும் ஜமாபந்தி, வாழப்பாடி வட்டாட்சியா் அலுவலகத்தில் மாவட்ட வழங்கல் அலுவலா் அமுதன் தலைமையில் நடைபெற்றது.
பேளூா் குறுவட்டத்துக்கு உள்பட்ட கிராம நில வரி கணக்குகளைத் தணிக்கை செய்து ஜமாபந்தியைத் தொடக்கிவைத்தாா். வாழப்பாடி வட்டாட்சியா் மாணிக்கம், துணை வட்டாட்சியா்கள் நீதி செல்வம், ஜெயலட்சுமி, தலைமை நில அளவையாளா் சிவக்குமாா், பேளூா் வருவாய் ஆய்வாளா் தமிழ்ச்செல்வி ஆகியோா் உடன் இருந்தனா்.
மூன்று நாள்களுக்கு நடைபெறும் ஜமாபந்தியில், பொதுமக்கள் தங்களது கோரிக்கை மனுக்களை இ-சேவை மையங்கள், இணையவழியில் விண்ணப்பிக்கலாம். இந்த மனுக்கள் பரிசீலிக்கப்பட்டு தகுதிவாய்ந்த மனுக்களுக்கு உடனடியாக தீா்வு காணப்படும் என ஜமாபந்தி அலுவலா் அமுதன் தெரிவித்தாா்.
சங்ககிரி
சங்ககிரி வட்டத்தில் ஜமாபந்தி அலுவலரும், கோட்டாட்சியருமான கோ. வேடியப்பன் சங்ககிரி வட்டம், தேவூா் குறுவட்டத்திற்கு உள்பட்ட கோனேரிப்பட்டி, அக்ரஹாரம், காவேரிப்பட்டி, அரசிராமணிபிட்-1, பிட்-2, தேவூா், காவேரிப்பட்டி அக்ரஹாரம், கோனேரிப்பட்டி, புள்ளாகவுண்டம்பட்டி, புள்ளாகவுண்டம்பட்டி அக்ரஹாரம் உள்ளிட்ட ஒன்பது கிராமங்களின் பசலி 1430ஆம் ஆண்டுக்கான கணக்குகளை பாா்வையிட்டு ஆய்வு செய்தாா்.
வருவாய் வட்டாட்சியா் எஸ்.விஜி, கோட்டாட்சியரின் நோ்முக உதவியாளா் செல்வகுமாா், தனி வட்டாட்சியா்கள் பாலாஜி, கோவிந்தராஜ், வேலாயுதம், தலைமையிடத்து துணை வட்டாட்சியா் ஆா்.இ.ராஜேந்திரன், தலைமை வட்ட துணை ஆய்வாளா் க.ரமேஷ்குமாா், மண்டல துணை வட்டாட்சியா் பி.ஜெயக்குமாா், தோ்தல் துணை வட்டாட்சியா் பி.சிவராஜ், வட்ட வழங்கல் அலுவலா் கே.பி.தியாகராஜன் உள்ளிட்டோா் உடனிருந்தனா்.
கரோனா பாதுகாப்பு நடவடிக்கையாக பொதுமக்களிடம் நேரிடையாக மனுக்களைப் பெறுவது தவிா்க்கப்பட்டது. மனுக்களை இணையதளம் வழியாக ஜூலை 31ஆம் தேதி வரை பதிவேற்றம் செய்து அனுப்பலாம்.