கரோனா நிவாரண நிதியாக 2 பவுன் தங்கச் சங்கிலியை வழங்கிய சேலத்தை அடுத்த மேட்டூா் அருகே உள்ள பொட்டனேரியைச் சோ்ந்த பெண் பட்டதாரிக்கு உரிய வேலை கிடைக்க நடவடிக்கை எடுக்கப்படும் என முதல்வா் மு.க.ஸ்டாலின் உறுதி அளித்துள்ளாா்.

டெல்டா குறுவைப் பாசனத்துக்கு சனிக்கிழமை மேட்டூா் அணையிலிருந்து தண்ணீா் திறந்துவைப்பதற்காக சென்ற மு.க.ஸ்டாலினிடம் மேட்டூா், பொட்டனேரி கிராமம் பகுதியில் பொதுமக்கள் அளித்த பல்வேறு கோரிக்கை மனுக்களை பெற்றுக் கொண்டாா்.

அந்த மனுக்களை பரிசீலிக்கும் போது, சேலம் மாவட்டம் மேட்டூா் வட்டம், பொட்டனேரி கிராமத்தைச் சோ்ந்த ஆா்.செளமியா அளித்த மனுவில், ‘என்னிடம் பணம் இல்லாததால் கரோனா நிதியாக கழுத்தில் அணிந்துள்ள 2 பவுன் தங்கச் சங்கிலியை அளிக்கிறேன்’ என எழுதப்பட்டிருந்த கடிதத்தை பாா்த்து முதல்வா் நெகிழ்ந்தாா்.

இதுகுறித்து தனது சமூக வலைதளப் பக்கத்தில் முதல்வா் மு.க.ஸ்டாலின் பதிவிட்டுள்ளதாவது:

மேட்டூா் அணையைத் திறக்கச் சென்றபோது பெறப்பட்ட மனுக்களில் ஆா்.சௌமியாவின் அளித்த கோரிக்கை மனு கவனத்தை ஈா்த்தது. பேரிடா் காலத்தில் உதவ முன்வந்த அவரது எண்ணம் நெஞ்சத்தை நெகிழ வைக்கிறது. விரைவில் அவரது படிப்பிற்கு ஏற்ற உரிய வேலை கிடைக்க உரிய நடவடிக்கை மேற்கொள்ளப்படும் என உறுதியளித்துள்ளாா்.

முன்னதாக தமிழக முதல்வருக்கு ஆா்.செளமியா அளித்த மனுவில், ‘நான் பி.இ. கணிப்பொறி அறிவியல் பட்டதாரி. எனது தந்தை ராதாகிருஷ்ணன், ஆவின் நிறுவனத்தில் ஓய்வுபெற்ற பணியாளா். சகோதரிகளுக்கு திருமண செலவு, படிக்க வைப்பதற்கு அதிக செலவு செய்துவிட்டாா்.

எனது தாய் உடல்நலம் சரியில்லாமல் உயிரிழந்துவிட்டாா். எங்களது வாழ்க்கை தரத்தை உயா்த்த அரசு அல்லது தனியாரில் வேலைவாய்ப்பு வழங்குமாறு கேட்டுக் கொள்கிறேன். என்னிடம் பணம் இல்லாததால் தான் அணிந்துள்ள 2 பவுன் தங்கச் சங்கிலியை அளிக்கிறேன் அன அதில் குறிப்பிட்டுள்ளாா்.

அப் பெண்ணை அமைச்சா் வி.செந்தில் பாலாஜி, ஆட்சியா் எஸ்.காா்மேகம், சேலம் மேற்கு மாவட்ட பொறுப்பாளரும், முன்னாள் அமைச்சருமான டி.எம்.செல்வகணபதி உள்ளிட்ட பல்வேறு தரப்பினா் பாராட்டு தெரிவித்தனா்.